"Türkiyə Rusiyaya qarşı sanksiyalara qoşulmayacaq" - Ərdoğandan növbəti xatırlatma
“Türkiyə Rusiyaya qarşı sanksiyalarda iştirak etməyəcək”.
“RİA Novosti” xəbər verir ki, bunu Türkiyə Prezidenti Rəcəb Tayyib Ərdoğan Özbəkistandan qayıdarkən təyyarədə jurnalistlərin suallarını cavablandırarkən deyib.
“Biz daha əvvəl də dəfələrlə bəyan etmişik ki, Rusiyaya qarşı sanksiyalarda iştirak etməyəcəyik və bunun səbəblərini izah etmişik”, - deyə Ərdoğan söyləyib.
O, həmçinin əlavə edib ki, sanksiyalar məsələsində Ankaranın Rusiyaya qarşı mövqeyi dəyişməyib.
“Bir tərəfdən Rusiyanın hərbi əməliyyatına münasibətimizi bildirməklə yanaşı, digər tərəfdən də dialoqumuzun davam etdirilməsinə də əhəmiyyət veririk. Bu dialoq təkcə Ukrayna kontekstində deyil, həm də Suriya, Liviya və Cənubi Qafqaz kimi bizi yaxından maraqlandıran bir çox region baxımından mühüm və vacibdir”, - deyə Ərdoğan əlavə edib.
