Ermənilər Türkiyə ilə barışmaq istəmirlər - "Gallup International" təşkilatının sorğusu
Son vaxtlar rəsmi İrəvan Türkiyə ilə münasibətlərin normallaşması üçün addımlar atır, erməni xalqının Türkiyə ilə əlaqələri yaxşılaşdırmaq istəyini bəyan edirdi. Lakin Ermənistanda keçirilən sorğu bunun tam əksini ortaya qoydu.
“Gallup International” təşkilatı Ermənistan vətəndaşları arasında sorğu keçirib. Aprelin 2-dən 4-dək davam edən sorğuda 1002 vətəndaş iştirak edib. Sorğunun əsas mövzusu Ermənistanla Türkiyə arasında barışıq və sərhədlərin açılması olub.
Sorğunun nəticələrinə əsasən, Ermənistan vətəndaşlarının böyük əksəriyyəti Türkiyə ilə diplomatik münasibətlərin qurulmasına və sərhədlərin açılmasına qarşı çıxıb.
“11,2 faiz birmənalı olaraq Türkiyə ilə heç bir ilkin şərt olmadan diplomatik münasibətlərin qurulmasının və sərhədlərin açılmasının lehinədir, 59,3 faizi birmənalı olaraq əleyhinə çıxıb, 5,8 faizi isə cavab verməkdə çətinlik çəkib”, - deyə “Gallup” təşkilatının Ermənistan nümayəndəliyinin rəhbəri Aram Navasardyan bildirib.
Bundan əvvəl Ermənistan Xarici İşlər Nazirliyi Türkiyə ilə bağlı rəsmi mövqeyin ictimai sorğulara əsaslandığını bildirmişdi.
Xatırladaq ki, İrəvan və Ankara ötən ilin sonunda əlaqələrin normallaşması üzrə danışıqlar üçün xüsusi nümayəndələr təyin ediblər. Ermənistan tərəfdən danışıqlara parlamentin vitse-spikeri Ruben Rubinyan qatılır, Türkiyəni isə ABŞ-dakı keçmiş səfiri Serdar Kılıç təmsil edir. Onlar artıq bir neçə dəfə görüş keçiriblər.
Hazırda Türkiyə ilə Ermənistan arasında diplomatik əlaqələr mövcud yoxdur, iki ölkə arasında sərhədlər 1993-cü ildən Ankaranın təşəbbüsü ilə bağlıdır.
