ABŞ-də Qrenlandiya ilə bağlı qanun layihəsi hazırlanıb
ABŞ-nin yeni seçilmiş prezidenti Donald Trampın Nümayəndələr Palatasındakı Respublikaçı müttəfiqləri Qrenlandiyanın alınması üçün danışıqlara yol açacaq qanun layihəsi hazırlayıblar.
Bu barədə sənədin surətini əldə edən “Reuters” agentliyi məlumat yayıb.
Məlumata görə, qanun layihəsi Trampın əsas siyasi şüarı olan “Amerikanı yenidən möhtəşəm et” şüarına uyğun olaraq “Qrenlandiyanı yenidən möhtəşəm et” adlandırılıb. Sənədin müəllifləri Nümayəndələr Palatasının üzvləri Endi Oqls və Diana Harşbarger (hər ikisi Tennessi ştatındandır) olub. Agentliyin məlumatına görə, artıq 10 qanunverici qanun layihəsini dəstəkləyib.
“Reuters” xəbər verir ki, qanun layihəsində Trampın yanvarın 20-də vəzifəyə gəldikdən dərhal sonra “Qrenlandiyanı Birləşmiş Ştatlar tərəfindən əldə etmək məqsədi ilə Danimarka Krallığı ilə danışıqlara girmək” imkanı verən bənd var.
Bundan əlavə, qanun layihəsinə görə, Tramp, Danimarka ilə razılıq əldə olunarsa, beş gün ərzində sazişi, eləcə də bütün əlaqədar materialları və əlavələri Konqresin müvafiq komitələrinə təqdim etməli olacaq.
Tramp dəfələrlə bəyan edib ki, Kanada və Qrenlandiya ABŞ-nin bir hissəsi olmalıdır. Siyasətçinin sözlərinə görə, o, həmçinin Panama kanalını ABŞ-nin nəzarətinə qaytarmaq və Meksika körfəzinin adını Amerika körfəzi adlandırmaq niyyətindədir.
