Ruanda soyqırımında Fransanın əli var - YENİ SƏNƏD

Ruandada Tutsi soyqırımında Fransanın rolu olduğuna dair iddiaları möhkəmləndirən tarixi məxfi bir sənəd yayımlanıb. 

Azsiyasət.com xəbər verir ki, 1994-cü il tarixli teleqram “Madiapart” araşdırma saytı tərəfindən dərc olunub və həmin dövr Fransa hökumətinin soyqırım cinayətkarlarının qaçmasına icazə verdiyini üzə çıxarıb.

15 İyul 1994-cü ildə Tutsi soyqırımından məsul olan hökumət üzvləri Fransa ordusunun nəzarət etdiyi bir bölgədə olub. Fransanın Ruandadakı səfiri Yannik Cerard o dövrdə vəzifədə olan Prezident Fransua Mitterranın müşavirinin arxivində tapılan bir teleqramda bu şəxslərlə bağlı atılacaq addımlara dair Fransa rəhbərliyindən təlimat vermələrini xahiş edir.

“Beynəlxalq məhkəmə orqanlarının işlərinə qərar verməsini gözləmək üçün onları həbs etmək və ya dərhal ev dustaqlığına qoymaqdan başqa çarəmiz yoxdur”,- deyə səfir teleqramda qeyd edib.

Fransa XİN rəsmiləri isə cavab olaraq “Bütün dolayı kanallardan, xüsusilə Afrikadakı əlaqələrinizdən istifadə edərək özünüzü birbaşa ifşa etmədən səlahiyyətlilərə “Humanitar Təhlükəsiz Zona”nı tərk etmələrini istədiyimizi çatdıra bilərsiniz. Xüsusi olaraq qeyd edin ki, beynəlxalq ictimaiyyət və xüsusən də Birləşmiş Millətlər bu qondarma səlahiyyətlilərlə bağlı nə qərar verəcəyini çox tezliklə müəyyənləşdirəcəkdir”, - deyə bildiriblər.

BMT-yə görə, 1994-cü ilin aprel və iyul arası üç ay ərzində ümumilikdə 800.000 Tutsi etnik azlığına mənsub mülki vətəndaş soyqırıma məruz qalıb.

Soyqırım 6 aprel 1994-cü ildə Ruanda Prezidenti Jüvenal Xabiarimananın təyyarənin partladılması nəticəsində öldürülməsindən sonra Hutu hökuməti tərəfindən həyata keçirilib.

Fransız səlahiyyətlilərinin şübhəlilərin qaçmasına icazə verməsini və bu istiqamətdə biganəliyini ifşa edən sənəd tədqiqatçı Fransua Qğanenin uzun bir məhkəmə prosesindən sonra giriş əldə edə bildiyi açılmamış arxivlərindən götürülüb.

“Fransa səlahiyyətliləri soyqırımı həyata keçirənlərin BMT-nin onlarla bağlı hələ qərar verməməsinə baxmayaraq həbs olunmadan ərazini tərk etməsinə icazə verdi. Tutsi soyqırımının təşkilatçıları olduqlarını yaxşı bilsələr belə, onları beynəlxalq ədalətin sərəncamında saxlamaq əvəzinə, Fransa ordusunun nəzarətindəki bölgəni tərk etmələrinə imkan verdilər”,- deyə tədqiqatçı və “Survie” dərnəyinin üzvü Qğane qeyd edib.