"Azərbaycan Rusiya mallarının Ermənistana tranzitinin mümkünlüyünü təsdiqləyib" - Overçuk
"Rusiya Dəmir Yolları" (RDY) və onun regional həmkarları hazırda Rusiya mallarının Azərbaycan ərazisindən Ermənistana tranzitinin təşkili üzərində işləyirlər.
TASS xəbər verir ki, bu barədə jurnalistlərə Rusiya baş nazirinin müavini Aleksey Overçuk bildirib.
Bundan əvvəl Azərbaycan Prezidenti İlham Əliyev Bakının öz ərazisindən Ermənistana yük tranzitinə qoyulan məhdudiyyətləri aradan qaldırdığını bəyan edib.
"Azərbaycan tərəfi Rusiya məhsullarının Azərbaycan ərazisindən keçməklə Ermənistana tranziti üçün Azərbaycan dəmir yollarından istifadə imkanlarını təsdiqləyib. Bu baxımdan çox maraqlı irəliləyiş əldə etmişik. Hazırda "Rusiya Dəmir Yolları" regional həmkarları ilə birlikdə bu daşımaların təşkili üzərində işləyir. Həmçinin, bu yeni logistik marşrutun inkişafı üçün Kənd Təsərrüfatı Nazirliyinə müvafiq göstərişlər vermişik", - Overçuk qeyd edib.
