Baş redaktora və həyat yoldaşına 10 gün vaxt verildi - Azərbaycanı tərk etmələri üçün...
Azərbaycan Dövlət Miqrasiya Xidməti "Rossiya seqodnya" beynəlxalq informasiya ağentliyi Federal Dövlət Unitar müəssisənin Bakı filialı olan "Sputnik-Azərbaycan" saytının baş redaktoru Belarus vətəndaş Antonova-Trizno Veranika Olegovnanın Azərbaycanda müvəqqəti yaşama icazəsini ləğv edib. Bu barədə DMX-nin saytında bildirilir.
Antonava-Trizno Veranikaya və onun həyat yoldaşı Pavel Antonova müvəqqəti yaşamaq üçün yeni icazələrin verilməsindən də imtina edilib. Qərar 6 iyun tarixində verilib və bu gün dərc edilib.
"İnzibati icraat haqqında" qanunun 62-ci maddəsinə əsasən, qərar KİV-də dərc edildikdən 10 gün sonra ünvan sahibinə çatdırılmış hesab olunur.Odur ki, Belarus vətəndaşı olan hər iki şəxs 10 gün ərzində ölkəni tərk etmək məcburiyyətindədirlər.
Qeyd edək ki, "Sputnik-Azərbaycan" Agentliyi Kremlin məşhur təbliğatçısı Marqarita Simonyanın baş redaktoru olduğu Federal Dövlət Unitar müəssisənin Bakı filialıdır.
Agentliyin redaksiya siyasəti Azərbaycanın maraqlarına zidd olan nəşrlərlə əlaqədar tez-tez Bakının tənqidinə səbəb olur. Rəsmi və qeyri-rəsmi səviyyədə Rusiyanın bu agentliyinin Azərbaycanda fəaliyyətini qadağan etmək çağırışları səslənir.
