Ermənistanın revanşist "Müqavimət" hərəkatı üzvləri Azərbaycan rayonlarını gəzdi - FOTO
İyunun 21-23-də Ermənistan "Müqavimət" hərəkatının nümayəndələri Rusiya "sülhməramlı" kontingentinin dəstəyi ilə Azərbaycanın Laçın dəhlizi boyu dövlət sərhədini pozaraq üç günlük səfərlə Qarabağda olublar.
Bu haqda Ermənistanın News.am nəşri məlumat yayıb.
Azərbaycan və Türkiyəyə qarşı revanşist və irqçi şüarlarıyla seçilən erməni hərəkatının üzvləri Qarabağdakı erməni "siyasi" qüvvələrinin, separatçı qurumun qanunsuz "qanuverici" orqanının bütün fraksiyalarının və s. nümayəndələri və qondarma "DQR"-in keçmiş prezidentləri ilə görüşüblər.
“Hayastan” blokundan verilən məlumata görə, parlamentin müxalifətdən olan vitse-spikeri, "Daşnaksütyun" partiyası ali orqanının nümayəndəsi İşxan Saqatelyan, “Şərəf duyuram” blokundan deputat Tiqran Abramyan və digərləri Qarabağdakı separatçı-terrorçu rejimin "deputat"ları ilə birlikdə Əsgəranda, Tərtər rayonunun Ağdərə şəhərində və Xocavənd rayonu ərazilərində olub, burada sakinlər, "yerli icma rəhbərləri" ilə görüşüblər.
