Türkiyə və Ermənistan razılığa gəldi - Quru sərhədləri açılır
Türkiyə və Ermənistan arasında normallaşma prosesi üzrə xüsusi nümayəndələr - səfir Serdar Kılıç və Ermənistan parlamentinin sədr müavini Ruben Rubinyan arasında dördüncü görüş keçirilib. Danışıqlar Vyanada baş tutub.
Bu barədə Türkiyənin Xarici İşlər Nazirliyi məlumat yayıb.
Tərəflər Türkiyə və Ermənistan arasında quru sərhədlərinin üçüncü ölkə vətəndaşlarının keçməsi üçün ən qısa zamanda açılması barədə razılığa gəliblər, bununla bağlı lazımi prosesin başlanmasına qərar veriblər.
Bundan əlavə, Türkiyə ilə Ermənistan arasında birbaşa hava yük ticarətinin mümkün qədər tez başlaması barədə razılıq əldə olunub və bu məqsədlə zəruri prosesin başlanmasına qərar verilib.
Tərəflər, həmçinin iki ölkə arasında tam normallaşmaya nail olmaq üçün atıla biləcək digər mümkün konkret addımları da müzakirə edib, normallaşma prosesinin ilkin şərt olmadan davam etdirilməsi ilə bağlı razılıqlarını diqqətəə çatdırıblar.
***
17:32
Türkiyə və Ermənistanın xüsusi nümayəndələri dördüncü dəfə bir araya gəliblər.
Bu barədə Ermənistan Xarici İşlər Nazirliyinin mətbuat katibi Vaan Unanyan bildirib.
Xüsusi nümayəndələr Sərdar Kılıç və Ruben Rubinyan arasında görüş Vyanada keçirilir.
Qeyd edək ki, bundan əvvəl tərəflər arasında ilk görüş yanvarın 14-də Moskvada, fevralın 24-də və mayın 3-də isə Vyanada baş tutub.
