"Azərbaycan öz torpaqlarında antiterror əməliyyatı keçirir" - MHP-dən dəstək
Sentyabrın 27-dən etibarən Azərbaycan və Ermənistan arasında davam edən müharibə bütün dünyanın diqqət mərkəzindədir. Xüsusilə qardaş ölkə Türkiyə ilk gündən Azərbaycanın ən böyük dəstəkçisidir.
Azsiyasət.com xəbər verir ki, Türkiyənin Milliyətçi Hərəkat Partiyasının (MHP) İstanbul sədr müavini Bülent Maşaoğlu iki ölkə arasında illərdir davam edən Qarabağ münaqişəsi haqqında fikirlərini bakupost.az-la bölüşüb. Maşaoğlu Azərbaycanın öz torpaqlarında antiterror əməliyyatı keçirdiyini qeyd edib:
“Şükürlər olsun ki, erməni terrorçularının işğalı altındakı Azərbaycan torpağı Qarabağ azadlığa doğru gedir. Əslində Azərbaycan ordusu öz ərazilərində antiterror əməliyyatları həyata keçirir. Hamı bilir ki, bu mübarizə şübhəsiz, uğurla nəticələnəcək. Ona görə bəziləri narahat olmağa başlayıb. 30 ildir Azərbaycanın öz ərazilərində həyata keçirdiyi hərbi əməliyyatlar üçün atəşkəs istəyənlər indi haradadır?”
B.Maşaoğlu MHP lideri Dövlət Baxçalının sözlərinə də istinad edib:
"Liderimiz Dövlət Baxçalı və partiyamızın bu məsələyə münasibəti və ideologiyamız bəllidir. Baxçalı “Qanımızla, canımızla və varlığımızla Azərbaycanın yanındayıq” deyərək həmin münasibəti açıq-aşkar göstərdi. Azərbaycanlı qardaşlarımız unutmamalıdır ki, qələbə bizimdir, qələbə haqlınındır və bu mübarizədə tək deyillər. Çünki biz Azərbaycanıq, çünki biz Türkiyəyik, çünki biz dostdan əvvəl qardaşıq.
Güney azərbaycanlı soydaşlarımızın dediyi kimi:
Sən çağırsan gələrəm mən,
Sən yaşa Azərbaycan
Eybi Yoxdur, Ölərəm Mən,
Sən Yaşa Azərbaycan!...
Əbədiyyən var ol şanlı Azərbaycan, bütöv Azərbaycan…"
