Gənclər dini radikalizm və ekstremizmə "yox" deyir: İGİB layihəsini yekunlaşdırıb - FOTOLAR

“İslahatçı Gənclər” İctimai Birliyi(İGİB) Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə icra etdiyi “Dini radikalizm və ekstremizmə qarşı mübarizədə gənclərin rolunun artırılması” layihəsini başa çatdırıb.

Bu barədə məlumat verən İGİB sədri Fərid Şahbazlı bildirib ki, layihə Bakı, Gəncə, Lənkəran şəhərlərini, Quba, Zaqatala və Lerik rayonlarını əhatə edib:

“Layihədə ümumilikdə 200-dən artıq gənc iştirak edib. Layihə çərçivəsində Azərbaycandakı dini tolerantlıq mühitindən bəhs edən sosial çarx çəkilib. Layihənin icrasına Dini Qurumlarla iş üzrə Dövlət Komitəsi yaxından dəstək verib”.

Fərid Şahbazlı qeyd edib ki, layihə çərçivəsində təşkil olunan müzakirələrdə iştirak edən din xadimləri, ekspertlər bütün dünyada dini radikalizmin sürətlə yayıldığını, dindən əsl mahiyyətindən uzaq olan bir sıra digər məqsədlər üçün istifadə cəhdlərinin olduğunu bildiriblər. Qeyd olunub ki, hazırda müxtəlif dinlərin adı ilə pərdələnərək radikalizm və ekstermizim kimi qanunsuz fəaliyyətlərin həyata keçirilməsi, cəmiyyətin müxtəlif sosial təbəqələrindən olan insanların, xüsusilə də gənclərin bu proseslərdə alət kimi istifadə edilməsi cəhdləri açıq şəkildə ortadadır.

Fərid Şahbazlının sözlərinə görə, din xadimləri və ekspertlər bildiriblər ki, Azərbaycanda əsrlərdir dinlərarası münasibətlər sağlam şəkildə formalaşıb:

“Ölkəmiz dini tolerantlıq sahəsində dünyaya örnək bir mövqedə olmasına baxmayaraq, Azərbaycanda da radikal xarakterli cərəyanları yaymaq istəyənlər var. Radikalizmi doğuran başlıca səbəblərdən biri din haqqında məlumatsızlıq və yanlış yönləndirilmədir. Ona görə də dini radikalizmlə mübarizədə ilk növbədə gənclər arasında dini maarifçilik işinin təşkilinə xüsusi önəm verilməlidir. Gənclər arasında dini maarifləndirmənin gücləndirilməsi, dinimizin düzgün şəkildə insanlara aşılanması radikalizmin qarşısını alan ən güclü vasitədir. İcra olunan layihənin məqsədi də gəncləri bu istiqamətdə maarifləndirmək, dinin barışçıl mahiyyəti haqqında məlumat verməkdir”.