Fəzail Ağamalının biznesmen oğlu yenə məhkəməyə verildi - Dövlətdən 4437 manat vergi gizlədib
Deputat Fəzail Ağamalının oğlu Elçin Ağamalı məhkəməyə verilib.
Azsiyaset.com qafqazinfo.az-a istinadla xəbər verir ki, onun barəsində Dövlət Vergi Xidmətinin 5 Saylı Ərazi Vergilər İdarəsi Bakı Kommersiya Məhkəməsinə müraciət edib.
Məlum olub ki, Elçin Ağamalı rəhbəri olduğu “La Vida” MMC-nin vergi borclarını ödəmədiyi üçün barəsində iddia qaldırılıb. Bu günə olan rəsmi məlumatlara görə, “La Vida” şirkətinin 4437 manat ödənilməmiş vergi borcu var. İşə hakim Ülkər Həsənovanın sədrliyi ilə baxılacaq.
Azsiyaset.com xəbər verir ki, Elçin Ağamalı atasının biznesini idarə edir. O, eyni zamanda “Altus” MMC-nin sahibi kimi tanınır. O, 3 il öncə də kredit mübahisəsinə görə məhkəməyə verilmişdi. E.Ağamalıya qarşı iddia "PAŞA Bank" tərəfindən qaldırılmışdı.
Fəzail Ağamalı 27 ildir Milli Məclisin deputatıdır.
