Ruslar Ermənistandakı Rusiya bazası yaxınlığında Putinə qarşı aksiya keçirdi
Ermənistanın Gümrü şəhərində keçirilən Ukraynadakı müharibə əleyhinə yürüşdə 20-dən çox Rusiya vətəndaşı iştirak edib.
Bu haqda rusdilli nəşrlərdən biri məlumat yayıb.
Təşkilatçılar bildiriblər ki, etirazçıların mövqeyi yerli sakinlər arasında dəstək tapmayıb.
Aksiyada 20-yə yaxın adam iştirak edib, təxminən eyni sayda polis əməkdaşları onları müşayiət edib və əvvəlcədən müəyyən edilmiş marşrutla necə getməyi göstəriblər. Dram teatrının qarşısına toplaşan etirazçılar daha sonra Sayat Nova, Nikolay Rıjkov küçələri ilə pasifist şüarlar səsləndiriblər.
Gümrü şəhərinin bəzi sakinləri pasifist aksiyanın polislərin müşayiəti ilə həyata keçirilməsindən qəzəblənib. Ermənilərdən biri polisə müraciət edərək, "Baş verənlərə görə Putinin günahı var? Siz onları niyə müşayiət edirsiz? Bu biabırçılığa son qoysunlar" -deyə tələb edib. Təhlükəsizlik qüvvələrinə oxşar müraciətləri yoldan keçən bəzi şəxslər də səsləndirib.
Maraqlıdır ki, rusların Putin əleyhinə aksiyasını Rusiyanın Gümrüdəki konsulluğunun əməkdaşı da müşayiət edib və o, baş verənləri foto və videoya çəkib.
İştirakçılardan biri - Yuri Alekseev bildirib ki, Rusiyadan olan fəallar mitinq üçün Gümrünü təsadüfən seçməyiblər.
"Biz bilirik ki, burada Rusiyanın böyük hərbi bazası yerləşir və burada çoxları rusiyapərəstdir. Amma heç bir təxribat olmadı, hər şey rahat keçdi. Biz bütün fikirlərimizi bildirdik, düşündüklərimizi dedik".
Onun sözlərinə görə, aksiyanın məqsədi Gümrü sakinlərinin diqqətini Ukrayna ərazisində baş verənlərə və Rusiya hakimiyyətinin siyasətinə cəlb etmək olub. Onun sözlərini Marina Dyaçkova da təsdiqləyib, o da insanlara sülhün bərqərar olması ideyasını çatdırmağı vacib hesab edir.
Aksiya iştirakçısı, Moskvadan Ermənistana köçmüş İvan Demitkovski isə hesab edir ki, “Ermənistan tarixən Rusiyaya isti münasibət bəsləyir”. O, pasifist aksiyada iştirakını belə izah edib: "İndi mən bu amildən fəal istifadə edirəm, çünki mən Ermənistana gəlmişəm, burada məni sevirlər, mənim çox xoşuma gəlir. Mən bunun əbədi olaraq belə qalmasını istəyirəm".
Onun sözlərinə görə, Ermənistanda çoxları düşünür ki, “aksiya Putinə qarşı olduğu üçün bu, Rusiyaya qarşıdır”. "Amma bu, belə deyil. Putinin əleyhinə danışmaq - Rusiya əleyhinə danışmaq demək deyil. Ermənilərin belə düşünməsi məni məyus edir. Mənim vəzifəm onlara fərqli düşünməyə, hadisələrə başqa cür baxmağa kömək etməkdir", - o deyib.
"Gümrü sakinləri heç olmasa "Putini sevməyə dəyərmi" deyə düşünsələr, bu, artıq yaxşı nəticə olacaq",- deyə aksiyanın digər iştirakçısı Vladimir Kolodiy bildirib.
"Bütün planlarımı tamamilə pozan məlum hadisələrdən(Rusiyanın Ukraynaya təcavüzü- S.L.) dərhal sonra Ermənistana köçdüm. Burada siz təhlükəsiz şəkildə etiraz aksiyasına gedə, fikrinizi bildirə, müəyyən dəstək tapa bilərsiniz. Rusiyada bunu etmək olmaz... Mən Gümrü sakinlərinə həqiqəti çatdırmağı özümə vəzifə hesab etdim ki, qoy onlar düşünsünlər, öz fikirlərini bir daha nəzərdən keçirsinlər”- deyə aksiya iştirakçısı əlavə edib.
