Bir həftədə İrandan Türkiyə ilə bağlı iki saxta iddia...
Suriya müxalifəti İran mətbuatının “Türkiyə suriyalı müxalifləri öz ərazilərindən qovur” iddiasını təkzib edib.
Suriya Müxalif və İnqilabçı Qüvvələr Milli Koalisiyasının rəhbəri Səlim əl-Müslət İranın “Təsnim” xəbər agentliyinin iddiasının doğru olmadığını və Türkiyənin bununla bağlı hər hansı tələb irəli sürmədiyini vurğulayıb.
Koalisiya sədrinin müavini Bədr Camus da bu xəbəri təkzib edib. Xəbərin tamamilə yalan olduğunu vurğulayan Camus Türkiyə ilə münasibətlərinin mükəmməl olduğunu söyləyib.
Xarici işlər naziri Mövlud Çavuşoğlu ötən günlərdə koalisiya, Dialoq Komitəsi və Suriya Müvəqqəti Hökumətini təmsil edən yüksək səviyyəli nümayəndə heyətini qəbul edib.
İran ordusuna (SEPAH) yaxınlığı ilə tanınan “Təsnim” ötən günlərdə anonim mənbələrə istinadən yazıb ki, bir Türkiyə rəsmisi görüşdüyü Səlim əl-Müslətə Ankaranın Dəməşqlə əlaqələrinin bərpa oluna biləcəyini deyib. Koalisiya liderinin isə buna etiraz etdiyi iddia olunub.
“Təsnim” Suriya müxalifətinin Türkiyədəki bütün siyasi və media fəaliyyətini dayandırdığını və alternativ ölkə axtarışında olduğunu da iddia edib.
Qeyd edək ki, Çavuşoğlu bundan əvvəl də “Təsnim”in Prezident Rəcəb Tayyib Ərdoğanla Suriyadakı rejimin lideri Bəşər Əsəd arasında sentyabrda görüşün keçiriləcəyi iddiasını yalanlamışdı.
