Putindən rusların Ermənistana kütləvi köçünə reaksiya
Əgər gedənlərə orada işləmək daha rahatdırsa, mən Rusiya biznesinin Ermənistana və Avrasiya İqtisadi İttifaqının digər ölkələrinə köçürülməsinə normal yanaşıram.
Rusiya KİV-ləri xəbər verir ki, bunu Rusiya Prezidenti Vladimir Putin bildirib.
"Biz Rusiya biznesinin xeyrinə olan hər şeyi alqışlayırıq. Faktiki olaraq, Moskvada yaşayıb İrəvanda işləmək olar. Buna heç nə mane olmur. Çoxları artıq qayıdıblar, başa düşüblər ki, burada dəhşətli heç nə baş vermir, hər şey sabitdir. Kimsə Ermənistanda işləməyi xoşlayırsa, buyursun”, - deyə Putin Vladivostokda Şərq İqtisadi Forumunun plenar sessiyasında deyib.
Rusiya prezidenti əlavə edib ki, bəziləri İrəvanı yox, Bakını seçirlər, həmçinin “Qazaxıstanda çox yaxşı maliyyə zonası yaradılıb”. Rusiya dövlət başçısının sözlərinə görə, İT sektoru ilə əlaqəli biznes nümayəndələri ölkəni daha çox tərk edirlər.
Plenar iclasın moderatoru İlya Doronov Ermənistanın Rusiyadan “əmək miqrantlarının axını” ilə üzləşdiyini qeyd edərək, baş nazir Nikol Paşinyandan rusların yerli cəmiyyətə necə uyğunlaşdığını və onların ölkə iqtisadiyyatında hansı rol oynadığını soruşub. Rusiya prezidenti isə Paşinyanı qabaqlayaraq suala belə reaksiya verib: "Bağışlayın, Nikol. Siz cavab verməyə başlamazdan əvvəl demək istəyirəm ki, Rusiyaya daha çox erməni gəlib. 2 milyondan çox".
