Zaxarovadan Paşinyana cavab - "Reallığı xəyalla əvəz etmək olmaz"
Rusiya Xarici İşlər Nazirliyinin sözçüsü Mariya Zaxarova Ermənistanın Baş naziri Nikol Paşinyanın sərhəddə beynəlxalq müşahidəçilərin yerləşdirilməsi təklifinə münasibət bildirib.
Zaxarova üçtərəfli razılaşmaların həyata keçirilməsinin vacibliyini vurğulayıb.
O qeyd edib ki, razılaşmalarda nəzəriyyə və praktika, gələcək planlar var və sənədlər sadəcə vasitəçilər arasında və hər bir ölkə ilə ayrılıqda imzalanmayıb, uzun sürən tarixi münaqişənin tərəfləri arasında imzalanıb.
Zaxarova həm daxildən, həm də xaricdən razılaşmaları dəyişmək istəyənlərin olduğunu bildirib:
“Onlar çox şey vəd verirlər. Söz verməyi bacarırlar. Onların bu illər ərzində gördüyü işin nəticəsi olmadı. Əldə olunan üçtərəfli razılaşmalar isə kağız üzərində qalmadı. Onlar mərhələli şəkildə, addım-addım həyata keçirilir. Hər şey istəyən kimi reallaşmır. İstəyirik ki, maksimum olsun. Ona görə də reallığı xəyalla əvəz etmək olmaz".
