"Azərişıq" ASC-nin əməkdaşı iş otağında qadını döydü

08 oktyabr, 2022 10:51

“Azərişıq” ASC-nin əməkdaşı iş otağında polisin bacısını döyüb.

Pravda.az-ın əldə etdiyi məlumata görə, bu barədə Gəncə Şəhər Məhkəməsində keçirilən prosesdə elan olunub.

Qeyd edilib ki, hadisə Gəncə şəhərində yerləşən – “Azərişıq” ASC-nin Qərb Regional Enerji Təchizatı və Satışı İdarəsində qeydə alınıb.

Belə ki, İdarənin əməkdaşı iş otağında Nail İsgəndərov A.Musayevanı döyüb.

Daha sonra A.Musayeva hüquq-mühafizə orqanlarına müraciət edib. Nail İsgəndərov saxlanılıb və barəsində İnzibati Xətalar Məcəlləsinin (İXM) 157-ci (Döymə) maddəsi ilə inzibati protokol tərtib olunub və baxılması üçün məhkəməyə göndərilib.

Məhkəmədə Nail İsgəndərov deyib ki, hadisə günü A.Musayeva və N.Əsgərova onun iş otağına gəlib, ailəsini nalayiq ifadələrlə təhqir edib: “A.Musayeva mənə əl-qol atdı, özümü müdafiə etmək məqsədilə onun əlini saxladım. A.Musayevanın qardaşı və mərhum atası polis zabiti olduğundan polis əməkdaşları ilə əlaqələri var. Bu səbədən barəmdə hazırki material toplanaraq məsuliyyətə cəlb edildim.

Eləcə də 30.08.2022-ci il tarixdə A.Musayevanın İnzibati Xətalar Məcəlləsinin 510-cu (Xırda xuliqanlıq) maddəsi ilə təqsirli bilinməsinə dair keçirilən məhkəmə iclasında şahid qismində dindirilən Sənəm (şərti) adlı şəxs izahatında A.Musayeva ilə dəhlizdə rastlaşdığını və onun saçının belə dağılmadığını dedi. Buna görə birinci instansiya məhkəməsinin qərarının ləğv edilməsini və iş üzrə icraata xitam verilməsini xahiş edirəm”.

Məhkəmə iclasında zərərçəkmiş şəxs şikayətə etiraz edib. O bildirib ki, toplanmış sübutlarla Nail İsgəndərovun əməli təsdiq olunur.

Bundan başqa, məhkəmədə zərərçəkmiş şəxsin nümayəndəsi etiraz edərək deyib ki, ekspert rəyi, eləcə də iş üzrə toplanmış sübutlarla Nail isgəndərovun A.Musayevaya xəsarət yetirməsi tam sübut edilir.

Gəncə Şəhər Məhkəməsinin qərarına əsasən, Nail İsgəndərov İXM-in 157-ci maddəsi ilə təqsirli bilinib və 300 manat məbləğində cərimə olunub. O, bu qərardan narazı qalıb və apellyasiya şikayəti verib. Gəncə Apellyasiya Məhkəməsi onun şikayətini təmin etməyib.