Qara çörək qıtlığı nə vaxt aradan qalxacaq? - Ekspert

"Rusiyada vəziyyətin gərginləşməsi çovdar ununun idxalında müəyyən problemlər yaradıb. Məhsulun ardı gəlmədiyinə görə anbarlarda olan mövcud ehtiyatlardan daha qənaətlə istifadə olunur. Bu da mağazalarda qara çörəyin tapılmamasına səbəb olur".

Bu fikirləri bakupost.az -a iqtisadçı ekspert Eldəniz Əmirov bildirib.

İqtisadçı qeyd edib ki, ilin birinci yarısından ölkədə qara çörəklə bağlı vəziyyət normal olsa da, artıq ikinci yarısından müəyyən qıtlıqlar yaranıb:

"2022-ci ildə ölkəyə taxıl idxalında ən yüksək göstərici yanvarda qeydə alınıb. Əvvəlki ilin eyni dövrü ilə müqayisədə 400 faizlik idxal həyata keçirilib. Həmin dövrdə təbii olarq çovdar ununun da idxal həcmi əvvəlki illə müqayisədə yuxarı olub. Ona görə də ilin birinci yarısında demək olar ki, qara çörəklə bağlı ciddi problemlər yaşanmayıb. Amma sonradan çovdar ununun idxalda həcminin nisbətən azalması səbəbindən həm istehsalda, həm də təbii ki, satış yerlərində müəyyən məhdudiyyətlər müşahidə olunub".

Ekspert hesab edir ki, Rusiya-Ukrayna müharibəsinin daha kəskin fazaya keçməsi bu məsələdə həssaslığı artıraraq, logistik problemlər yaradıb:

"Bu problemin birbaşa təsiri olmasa da, vəziyyət anbarlarda olan çovdar ununun daha qənaətlə işlədilməsini tələb edir. Adi çörəkdən fərqli olaraq, qara çörəkdə bir çox vasitələrdən istifadə olunur. Hesab edirəm ki, bu dalğavari prosesdir, yəni davamlı olmayacaq. Çünki alternativ istiqamətlərdən, eyni zamanda Rusiyanın özündən logistik fəaliyyətlər tam bərpa olunandan sonra biz qara çörəklə bağlı hər hansı problemin olmadığını görəcəyik. Təcrübə göstərir ki, bəzi məhsullarda müəyyən zaman kəsiyində bir qədər qətlıq müşhidə olunsa də, daha sonra bu boşluq doldurulur. Bir sözlə, keçici bir prosesdir".

Xatırladaq ki, dünən Azərbaycanda qara çörəyin satışında qıtlıq olması ilə bağlı xəbər vermişdik.

Belə ki, ölkədə çovdar unu çörəyi əsasən, iki müəssisədə - "N1" Çörək Zavodu və "Çörəkçi" zavondunda istehsal olunur.

"N1" Çörək Zavodundan Bakupost.az -a bildiriblər ki, iki həftəyə yaxındır çovdar unu ala bilmirlər və bu səbədən qara çörək istehsalının dayandırıblar.