Kiyev yenidən İran dronları ilə vuruldu
Oktyabrın 17-də səhər saatlarında Ukrayna paytaxtında yenidən partlayış səsləri eşidilib.
"UNİAN" xəbər verir ki, Kiyev meri Vitali Kliçkonun sözlərinə görə, partlayış paytaxtın mərkəzindəki Şevçenko rayonunda baş verib.
"Bütün xidmətlər yoldadır. Təfərrüatlar daha sonra. Hava hücumu davam edir. Sığınacaqlarda qalın!", - deyə Kliçko çağırış edib. Daha sonra Kliçko növbəti partlayış barədə məlumat verib.
"TSN" kanalı xəbər verir ki, partlayış yerində yanğın başlayıb.
Ukrayna Prezident Ofisinin rəhbəri Andrey Yermak paytaxta kamikadze pilotsuz uçan aparatlarla hücum edildiyini bildirib.
"Ruslar bunun onlara kömək edəcəyini düşünürlər, lakin bu cür hərəkətlər ölümqabağı əzaba bənzəyir. Bizə daha çox hava hücumundan müdafiə sistemləri və mümkün qədər tez lazımdır. Bizim yavaş hərəkətlərə vaxtımız yoxdur. Səmanı qorumaq və düşməni məhv etmək üçün daha çox silah. Bu belə də olacaq..." - deyib Ukrayna rəsmisi.
Son vaxtlar Rusiya raket zərbələri ilə yanaşı, İran istehsalı olan kamikadze dronlardan da hücumlar üçün fəal şəkildə yararlanmağa başlayıb.
Ukrayna kəşfiyyatının məlumatına görə, Rusiya İrandan 2400 ədəd “Şahed” kamikadze dronu sifariş edib.
