Türk Dünyası Qiymətləndirmə Mütəxəssisləri Birliyi yaradılır

Türkiyədə işgüzar səfərdə olan Azərbaycan Qiymətləndiricilər Cəmiyyətinin (AQC) sədri Vüqar Orucla Türkiyə Qiymətləndirmə Mütəxəssisləri Birliyinin rəhbəri Yaşar Bahçeci arasında görüş keçirilib.

AQC-dən AZƏRTAC-a bildirilib ki, Vüqar Oruc Cəmiyyətin fəaliyyəti barədə türkiyəli həmkarına məlumat verib.

Qeyd edib ki, təmsil etdiyi qurum Azərbaycanın ticari assosiativ struktura malik ilk kollektiv ictimai birliklərindən biridir və 1999-cu ildən fəaliyyət göstərir. Bu ilin may ayında keçirilən konfransdan sonra cəmiyyətin fəaliyyətində ciddi dönüş yarandığını vurğulayan AQC sədri əlavə edib ki, qurum beynəlxalq təşkilatlarla əməkdaşlığa xüsusi önəm verir. Azərbaycanla Türkiyə arasında münasibətlər keyfiyyətcə yeni mərhələyə qədəm qoyub və Azərbaycan Qiymətləndiricilər Cəmiyyəti də Türkiyə Qiymətləndirmə Mütəxəssisləri Birliyi ilə fəal əməkdaşlıq etmək niyyətindədir.

Türkiyə Qiymətləndirmə Mütəxəssisləri Birliyinin rəhbəri Yaşar Bahçeci gələcək əməkdaşlığın perspektivlərindən bəhs edib. O diqqətə çatdırıb ki, Azərbaycan və Türkiyə qiymətləndiriciləri arasında əməkdaşlıq gücləndirilməlidir: “Məlumdur ki, son dövrlər iki qardaş dövlət - Azərbaycanla Türkiyə arasında münasibətlər ən yüksək səviyyəyə çatıb. Müxtəlif sahələrdə əməkdaşlıq müqavilələri imzalanır. Bu gün biz də belə bir tarixi sənədə imza atacağıq. Şadam ki, azərbaycanlı həmkarımla bir araya gəldik”.

Görüş çərçivəsində Azərbaycan Qiymətləndiricilər Cəmiyyəti ilə Türkiyə Qiymətləndirmə Mütəxəssisləri Birliyi arasında Əməkdaşlıq Memorandumu imzalanıb. Razılaşmaya əsasən, iki qardaş ölkə arasında qiymətləndirmə sertifikatlarının qarşılıqlı tanınması, bərabər layihələrin icra edilməsi qərara alınıb. Daha bir mühüm məqam isə Türk Dünyası Qiymətləndirmə Mütəxəssisləri Birliyinin ərsəyə gətirilməsi ilə bağlıdır. Qiymətləndirmə sahəsində türk dövlətlərinin inteqrasiyasını təmin etmək məqsədilə Azərbaycan və Türkiyə hökumətlərinə müraciət edilməsi barədə tərəflər razılığa gəliblər. Yeni yaranacaq birliyə Mərkəzi Asiyadakı türk dövlətləri və Şimali Kipr Türk Respublikasının da qoşulmalarını təmin etmək üçün birlikdə fəaliyyət göstərilməsi razılaşdırılıb.