Yeni Zelandiya İran vətəndaşlarına sanksiya tətbiq etdi
Yeni Zelandiya hökuməti ölkədə etiraz aksiyalarının yatırılması ilə əlaqədar İran İnqilab Keşikçiləri Qvardiyası (SEPAH) və İran Hüquq-Mühafizə Qüvvələri ilə əlaqəli 22 İran rəsmisinə sanksiya tətbiq edib.
Bu barədə bazar ertəsi Baş nazir Casinda Ardern və xarici işlər naziri Nanaya Mahutanın yaydığı bəyanatda deyilir:
“Yeni Zelandiya Məhsa Əminin ölümü ilə bağlı etirazlara qarşı davam edən repressiyalarla əlaqədar İran təhlükəsizlik rəsmilərinə sanksiyalar tətbiq edir. Biz həmçinin İranda baş verən hadisələrə daha yaxından diqqət yetirməyə və araşdırmağa davam edəcəyik. İran hökumətini etirazlara daha yumşaq reaksiya verməyə və bütün ölüm hökmlərinin ləğvinə çağırırıq”.
Yeni Zelandiya liderlərinin bəyanatında bildirilir ki, sanksiya siyahısına ölkəyə girişi qadağan olunmuş 22 İran vətəndaşının adı var. Bura polis müavinləri, bir sıra hüquq-mühafizə orqanlarının rəhbərləri, SEPAH komandanlığı və İran Bəsic milislərinin üzvləri daxildir.
Qeyd edək ki, İranda iğtişaşlar sentyabrın 16-da 22 yaşlı Məhsa Əmininin dəfnindən sonra başlayıb.
