Sahibkarlar Sumqayıtla bağlı Prezidentə növbəti müraciət etdilər
“Cənab Prezident, bizi Zakir Fərəcov və Adil Xudadatovun zülmündən xilas edin!”
Ölkədə fəaliyyəti ən çox tənqid edilən Sumqayıt Şəhər İcra Hakimiyyətinin başçısı Zakir Fərəcov və icra strukturları sistemində ən qalmaqallı isimlərdən olan Sumqayıt Şəhər İcra hakimiyyətində Tikinti şöbəsinin müdiri olan Adil Xudadatov barəsində sahibkarlar novbəti dəfə Prezident İlham Əliyevə müraciət edib. Z.Fərəcovun qaranlıq işlərinin əsas icraçısı olan A.Xudadatovun qanunsuz əməlləri ilə bağlı mediada indiyə qədər onlarla, bəlkə də yüzlərlə məqalə dərc edilib.
Sahibkarlar müraciətində Z.Fərəcov və A.Xudadatovun onlara qarşı həyata keçirdikləri özbaşınalıqların dözülməz həddə çatdığını bildirirlər:
“Bəribaşdan qed edək ki, Sumqayıt şəhəri üçün gördüyümüz quruculuq-abadlıq işlərinin pulunu ala bilmirik. Pulumuzu qaytarmaq əvəzinə o, bizlərə rüşvət təklif edir ki, məsələni qabartmayaq. Sual yaranır, dövlət büdcəsindən ayrılan vəsait niyə Adil Xudadatovun cibində, evində və ya seyfində olmalıdır? Gördüyümüz işlərə görə alacağımız vəsait niyə bizə köçürmə yolu ilə verilmir ki, nəticədə A.Xudadatov kimilərin qanunazidd addımları ilə üz-üzə qalırıq!? A.Xudadatovu Sumqayıtda tanımayan yoxdur. Harda qara işlər varsa, Zakir Fərəcov onu göndərir - qanunsuz tikililərdən tutmuş yaşıllıqların məhvinə qədər...”.
Sahibkarlar daha sonra bildirirlər: “Biz buradan Dövlət Şəhərsalma və Arxitektura Komitəsinə də müraciət edirik. Son dövrlər Sumqayıtda nə qədər qanunsuz tikililər var ki, bütün bunlardan onların da xəbəri yoxdur. A.Xudadatov bütün bu qanunsuzluqları müxtəlif üsullarla Komitədən də gizlədib. Balkon artırma, sənədsiz tikinti və s. baş alıb gedir”.
“Adil Xudadatov özünü Sumqayıt şəhərinin növbəti icra başçısı kimi görür”, - sahibkarlar belə deyirlər.
Təsadüfi deyil ki, Sumqayıtda bütün tikinti, abadlı işləri ilə bağlı məsələlər Xudadatovun kurasiyasındadır, onun icazəsi olmadan, daha doğrusu, ona pul vermədən şəhərdə daşı-daş üstə qoymaq mümkün deyil:
“Cənab Prezident, Adil Xudadatov Zakirin Abşeronda olandan qara işləri ilə məşğul olduğuna görə dəfələrlə cəzalanıb. Hətta 15 sutka həbsdə də yatıb. Dəfələrlə vəzifəsindən uzaqlaşdırılıb. Amma bu adam hələ də yüksək dövlət vəzifəsi tutur”.
Sahibkarlar qeyd edirlər ki, Dövlət Şəhərsalma və Arxitektura Komitəsinin iradlarından və aşkarladığı nöqsanlardan sonra Xudadatov yanvar ayının əvvəlindən tutduğu vəzifədən (Baş memar) azad edilərək cərimələnib:
“Onun yerinə Babək Hüseynovu təyin edilib. Əlacsız qalan Zakir Fərəcov Xudadatovu tikinti şöbəsinə müdir təyin edib. Yəni, Xudadatovun şəhərin memarlıq məsələsinə qarışmaq səlahiyyəti yoxdur. Amma heç bir faydası yoxdur. Zakir Fərəcovun qara kassası və güllə qabağına vermək üçün “peşqası” hər dəfə yanında olur. Biz, dəfələrlə Zakir Fərəcova və ölkənin yuxarı instansiyalarına müraciət edərək öz haqqımızı tələb etməyə cəhd göstəmişik. Hər dəfəsində Zakir Fərəcov Adil Xudadatovu qabağa verərək bizi aldatmağa çalışıb”.
“Cənab Prezident! Sizdən xahiş edirik, bu dəfə Dövlət Təhlükəsizlik Xidmətini Sumqayıta göndərin. Onlar araşdırsınlar. Sumqayıtda baş verənləri görsəniz inanırıq ki, ölkənin ən böyük şəhərlərindən olan burada hökm sürən qanunsuzluqlarla bağlı təcili tədbirlər görəcəksiniz”, - sahibkarlar Prezidentə ünvanladıqları müraciətdə bildirirlər.
Dərin Hörmətlə,
Zakir Fərəcov və Adil Xudadatovun əlindən zara gəlmiş bir qrup sahibkar
