Türkiyədəki zəlzələ Azərbaycanın mənzil bazarını "vurdu"
Türkiyədə minlərlə insanın ölümü və yaralanması ilə nəticələnən zəlzələ Azərbaycanın əmlak bazarına da təsirsiz ötüşməyib.
Bu barədə "MBA" konsaltinq və qiymətləndirmə şirkətinin baş direktoru Nüsrət İbrahimov məlumat verib. Onun sözlərinə görə, hazırda əmlak bazarında durğunluq hökm sürür:
“İnsanlar kənara çəkilib, gözləmə mövqeyi tuturlar. Buna səbəb qardaş Türkiyədə baş verən zəlzələ ilə bağlıdır. İnsanları Azərbaycanda bu istiqamətdə hansı qəraraların qəbul olunub, həyata keçiriləcəyi maraqlandırır. 2000-ci ilin noyabrında da eyni hadisə baş vermişdi. İnsanlar onda da gözləmə mövqeyinə keçmişdilər. Ancaq 2 aydan sonra yenə hər kəs mənzil bazarına qayıtmışdı. Yəni hadisənin yaddaşdan silinməsi üçün zaman lazımdır”.
Ekspertin sözlərinə görə, durğunluq çox çəkməyəcək. Çünki mənzilə ehtiyacı olanlar əsasən gənc nəslin nümayəndələridir:
"Onlar gedib ucqar yerlərdə həyət evi alan deyillər. Çünki bu insanlar işə gedib gəlirlər, uşaqlarını məktəbə, bağçaya aparırlar. Bir sözlə, aktiv həyat tərzi keçirirlər. Ona görə də, həmin şəxslər şəhər mərkəzində ev sahibi olmağı arzulayırlar”.
N.İbrahimov bəzi insanların Türkiyədəki zəlzələdən sonra mənzillərini satıb həyətə evi almaq istəməsi ilə bağlı iddialara da aydınlıq gətirib:
“Biz hələ mənzilini satıb, həyət evi almaq niyyətində olan insanlara rast gəlməmişik. Yəni bu gün həyət evlərinə axın yoxdur. Bazarın aktiv iştirakçısı kimi belə bir hadisəni qeydə almamışıq”.
Qeyd edək ki, fevralın 6-da yerli vaxtla saat 4:17-də Türkiyənin Kahramanmaraş vilayətinin Pazarcık rayonunda 7,7 bal, saat 13:24-də isə Elbistan rayonunda 7,6 bal gücündə iki zəlzələ qeydə alınıb. Zəlzələ Türkiyənin daha 10 şəhərinə ziyan vurub. Ümumilikdə 7 minə yaxın bina çöküb.
Son məlumata əsasən, zəlzələ nəticəsində 18 342 nəfər həyatını itirib, 74 242 nəfər isə yaralanıb(modern.az).
