Bərdədə “Tarixin Zəfər Yolu” kitabının təqdimatı olub - FOTOLAR

İctimai Siyasi Proseslər Beynəlxalq Araşdırmalar Mərkəzinin (İSBAM) təşkilatçılığı ilə Bərdə şəhər Heydər Əliyev mərkəzində Sübut Mehdiyevin müəllifi olduğu "Tarixin Zəfər Yolu" kitabının təqdimat mərasimi keçirilib. 

Mərasim Xocalı qurbanlarının, şəhidlərimizin və Türkiyədə zəlzələdə həlak olanların xatirəsini bir dəqiqəlik sükutla yad edərək başlayıb.

Tədbiri giriş sözü ilə açan Bərdə  Rayon İcra Hakimiyyətinin rəsmisi Asif Abbasov qonaqları salamlayaraq kitab haqqında ümumi məlumat vermişdir. Sonra tədbirin təşkilatçısı İSBAM sədri Samir Adıgözəlli çıxış edərək "Tarixin Zəfər Yolu" kitabının gənc nəslin maarifləndirilməsində, şəhidlərimizin xatirəsinin əbədiləşdirilməsində  öz töhfəsini verəcəyini bildirmişdir.

İSBAM sədri  44 günlük Vətən müharibəsinin yazıçılar, jurnalistlər, araşdırmaçılar  tərəfindən ciddi tədqiq edilməklə  tarixləşdirilməsinin zəruriliyini bildirib.

 Daha sonra tədbirdə iştirak edən Çexiyada yaşayan professor Azər Kərimov, təhsil işçiləri Leyla Məmmədova, Tamella Əliyeva, şəhid Xudayar Yusifzadənin anası Radə xanım, şəhid Fəxri Qəribzadənin anası  Mehbarə xanım, şəhid Elməddin Hüseynzadənin anası  Arzu xanım, şəhid Turqut Zeynalovun anası Zibeyde xanım və şəhid Səidin anası Əzizə xanım  çıxış edərək işiq üzü görən kitabın müəllifi Sübut Mehdiyevə və tədbirin təşkilatçılarına təşəkkürlərini bildirdilər.

Çıxışçılar qeyd etdilər ki, hər bir şəhidin  xatirəsinə belə dəyərli kitabların  həsr olunması cəmiyyət qarşısında böyük xidmətdir.

Müəllif Sübut Mehdiyev çıxış edərək kitabın məzmun və ideya xətti barədə  iştirakçıları məlumatlandırdı. O, zəfərə gətirən  yolda qəhrəman Vətən oğullarının şücaətlərini qələmə almaqla ilk növbədə öz mənəvi borcunu yerinə yetirdiyini qeyd edib. S. Mehdiyev bundan sonra da 30 il işğalda olan  Qarabağın azadlığı uğrunda əməyi, zəhməti keçən hər bir  qəhrəmanın döyüş yolunu  öz qələmi  ilə tarixləşdirəcəyinə söz verdi.

Sonda  müəllif tərəfindən iştirakçılara kitablar imzalanaraq təqdim edildi.

İSBAM -ın təşkilatçılığı ilə keçirilən təqdimat mərasimində rayon ziyalıları, qazi və şəhid ailələri iştirak etmişdir.

İSBAM mətbuat xidməti.