"Seçkini qazansaq, ABŞ təxribata əl atacaq" - Türkiyəli hərbi ekspert
Türkiyədə keçiriləcək prezident seçkiləri yaxınlaşdıqca rəqib namizədlər arasında mübarizə şiddətlənir.
Gərgin şəraitdə keçəcəyi gözlənilən bu seçkidə prezidentlik uğrunda "Cümhur İttifaqı"ndan Prezident Rəcəb Tayyib Ərdoğan, "Millət İttifaqı"ndan Kamal Kılıçdaroğlu, Məmləkət Partiyasından Məhərrəm İncə və "ATA İttifaqı"ndan Sinan Oğan mübarizə aparacaqlar.
Bəs, Türkiyənin gələcəyini şəkillədirəcək bu seçimlərdə kimin şansı daha çoxdur?
Mövzu ilə bağlı türkiyəli hərbi ekspert, sabiq kəşfiyyat polkovniki Coşkun Başbuğ bakupost.az -a açıqlama verib.
Onun sözlərinə görə, Türkiyədəki seçki yalnız bu ölkə vətəndaşlarını deyil, bütün dünyanı, xüsusilə Türk dünyasını yaxından maraqlandırır.
Ekspertin sözlərinə görə, bu seçki Türkiyə tarixində ən kritik seçki olacaq:
"Həqiqətən gələcək yüz ilə öz təsirini göstərəcək bir seçimdir. Bu seçkidə "Cümhur İttifaqı" və cənab Ərdoğan qalib gələrsə, Türk dünyası və Türkiyənin yolu çox aydındır. Ancaq ABŞ-ın dəstəklədiyi "Millət İttifaqı" iqtidara gələrsə, başda Türk dünyası olmaqla hamımızı çətin günlər gözləyir".
Ekspert deyib ki, bu yaxınlarda Ermənistan rəhbərliyinin Azərbaycana göndərdiyi mesaj təsadüfi deyildi:
"Paşinyan ötən günlərdə prezident İlham Əliyevə mayın 14-nü işarə edərək mesaj göndərmişdi. Bu mesajda o, əgər "Millət İttifaqı" seçilsə, Ermənistan itirdiklərini geri alacaq deyə bir cümlə qurmuşdu. Bu cümləyə çox diqqət edilməlidir. Bunlar boş sözlər deyil. Eynilə, Amerika,Yunanıstan, bütün Avropa paytaxtları Türkiyədəki seçkiləri ciddi şəkildə gözləyir. Buna görə də vəziyyət çox kritikdir. Amma indiki mənzərə Prezident Ərdoğanın təmsil olunduğu "Cümhur İttifaqı"nın seçkilərdə qalib gələcəyini göstərir”.
Coşkun Başbuğ qeyd edib ki, küçələrə çağırış məsələsi gündəmə gələndə artıq Türkiyədə siyasi oyunların başladıdığını demək olar:
“Seçkini qazansaq, ABŞ tərəfindən təxribat xarakterli addımlar planlaşdırıla bilər. Millət olaraq prosesi yaxından izləməli və bu tələyə düşməməliyik. Dövlət təhlükəsizlik tədbirləri görür. Biz insanlara belə bir təhlükənin olduğunu deməyə çalışırıq. Ümid edirəm ki, xalq hadisələrin gedişatına uyğun olaraq düzgün mövqe tutacaq”.
