Sahibkar qadınlar bir araya gəlir - İki təşkilat arasında memorandum imzalandı
Aprelin 7-də Azərbaycan Sahibkar Qadınlar İctimai Birliyinin Mərkəzi Qərargahında Azərbaycan Qadın Sahibkarlarının Assosiasiyası ilə qarşılqılı əməkdaşlığa dair Anlaşma Memorandumu imzalanıb. Bununla bağlı təşkil olunan tədbir Azərbaycan xalqının ümumilli lideri Heydər Əliyevin və torpaqlarımızın azadlığı uğrunda canından keçmiş şəhidlərimizin xatirəsinin bir dəqiqəlik sükutla yad edilməsi və Azərbaycan Respublikasının Dövlət Himni ilə açıq elan olunub.
Mərasimdə giriş nitqi söyləyən Azərbaycan Sahibkar Qadınlar İctimai Birliyinin sədr müavini, Təhsil Müəssisələrinin Beynəlxalq Humanist Pedaqogika Assosiasiyasının İdarə Heyətinin üzvü, təhsil meneceri Afaq Əliyeva bildirib ki, cənab Prezident İlham Əliyevin rəhbərliyi altında həyata keçirilən iqtisadi islahatlar ölkə vətəndaşlarının qarşısında geniş imkanlar açır və hər bir Azərbaycan vətəndaşı bu inkişafın nəticələrini öz gündəlik həyatında hiss edir. A.Əliyeva sahibkarlığın inkişafı istiqamətində fəaliyyət göstərən ictimai birliklərin səylərinin gücləndirilməsinin vacibliyindən bəhs edib. Əlavə edib ki, Azərbaycan Sahibkar Qadınlar İctimai Birliyi ilə Azərbaycan Qadın Sahibkarlarının Assosiasiyası arasında Anlaşma Memorandumunun imzalanması da məhz bu məqsədə xidmət edir.
Azərbaycan Sahibkar Qadınlar İctimai Birliyinin təsisçisi və sədri, Tərəqqi medalı, III Dərəcəli Əmək ordeni laureatı, tanınmış sahibkar, “Qızıl əllər” şirkətinin təsisçisi Zenfira Ağayeva çıxışında vurğulayıb ki, sahibkarlığın inkişafı və tərəqqisi müstəqil Azərbaycan dövlətinin memarı Heydər Əliyevin adı ilə bağlıdır. Qeyd edib ki, bu siyasət bu gün də onun varisi, cənab Prezident İlham Əliyev tərəfindən uğurla davam etdirilir.
Daha sonra Azərbaycan Qadın Sahibkarlarının Assosiasiyasının təsisçisi və sədri, “Meridian” Humanitar İctimai Birliyin sədri və təsisçisi, “Uğur” tikinti şirkətinin prezidenti, “Baby Hall” körpələr evi – uşaq bağçasının sahibi və rəhbəri, “Beauty Hall” sağlamlıq və gözəllik mərkəzinin sahibi Vəfa Əfəndiyeva söyləyib ki, ölkə prezidentinin apardığı siyasət iş adamlarının qarşısında geniş üfüqlar yaradır. O deyib ki, sahibkarlar və şirkətlər arasında əməkdaşlığın artırılması labüddür.
Azərbaycan Milli Qeyri-Hökümət Təşkilatları Forumunun prezidenti Rauf Zeyni bildirib ki, sahibkarların yetişdirilməsi istiqamətində yeni texnologiyaların və innovativ proqramların tətbiqi, qarşılıqlı təcrübə mübadiləsi istiqamətində təcrübə mübadiləsi təşkil edilməlidir. “Azcosmetics Qrup” şirkətinin təsisçi və direktoru Ulduz Xanlarova, Azərbaycan Qadın Sahibkarlarının Assosiasiyasının sədr müavini, “Top tours” turizm şirkətinin təsisçisi və direktoru, “Hlorella Newbio Baku” şirkətin rəsmi nümayəndəsi, “Zenith Group” şirkətinin satış direktoru, “Chokolama” markalı şokolad məhsullarının istehsalçısı İlhamə Şirinova hər iki təşkilat arasında elmi-praktik əməkdaşlıq, innovasiyaların tətbiqi, kadr hazırlığı, məlumat mübadiləsinin aparılması, mütəxəssis və peşəkarların cəlb olunması, tədbir, konfrans, seminar və görüşlərin keçirilməsinin əhəmiyyətini qeyd ediblər.
“CVM Jewellery” “Vəsfi Xarə” şirkətlərinin təsisçi və direktoru, “Umay” Türk dünyası qadınlarına dəstək İctimai Birliyinin sədri Vəsilə Abulova söyləyib ki, iki tərəf arasında yeni layihələrin işlənməsi sahəsində hüquq bazasının təkmilləşdirilməlidir.
“Milli Dəyərlər üzrə Maarifləndirmə” İctimai Birliyinin təsisçisi və sədri, “Atilla” jurnalının baş redaktoru Gülşən Behbud isə iki birlik arasında etibarlı tərəfdaşlığın vacib olduğunu diqqətə çatdırıb.
Yekunda Azərbaycan Sahibkar Qadınlar İctimai Birliyinin baş ofisində Azərbaycan Qadın Sahibkarlarının Assosiasiyası arasında Anlaşma Memorandumu imzalanıb.
