Restoranlarda qiymətlər niyə artıb?
Son vaxtlar restoranlarda da qiymətlər artıb.
Belə ki, restoran sahibləri bu il menyuların qiymətində təxminən 8-15 faiz arasında bahalaşma olduğunu deyirlər.
Bəs, qiymət artımının əsas səbəbi nədir?
Məsələ ilə bağlı bakupost.az -a danışan iqtisadçı-ekspert Rəşad Həsənov bildirib ki bazar iqtisadiyyatının fundamental şərtlərindən biri tələb-təklif faktorudur:
"Restoranlarda qiymətləri tənzimləmək üçün mexanizm yoxdur. Bu bazara müdaxilə etmək gələcəkdə çox ciddi iqtisadi problemlərin, eləcə də qıtlığın yaranmasına səbəb ola bilər”.
Ekspertin sözlərinə görə, mövcud qiymət artımı ötən ildən başlayaraq davam edən inflyasiya ilə bağlıdır:
“Restoran qiymətlərinin artması ilə bağlı hər hansı müşahidə və qiymətləndirmə aparmamışam. Amma belə bir hal varsa, bu, 2022-ci ildə başlayan və 2023-cü ilin əvvəlində də davam edən bahalaşma ilə əlaqədardır. Bahalaşma birbaşa məhsulun maya dəyərinin artmasına səbəb olur. Eyni zamanda, işçilərin əmək haqqının artırılması zərurəti ortaya çıxır. Əmək haqqını artırmaqla məhsuldarlığı qorumağı, işçilərin işə meyilliliyini təmin edirlər”.
R.Həsənov qiymətin formalaşmasına təsir edən digər faktorlara da diqqət çəkib:
“Qiymətin formalaşmasında əsas səbəb təkcə maya dəyəri deyil. Alıcılıq gücü, tələb-təklif məsələləri də burada əsasdır. 2023-cü ilin əvvəlindən başladılan sosial paket əhalinin gəlirlərinin artması ilə nəticələnəcək. Bazar iştirakçıları, xidmət təklifçiləri də bu imkandan yararlanaraq öz mənfəət normalarını qəbul olunan formada saxlamağa çalışacaq”.
