"Kim Azərbaycanı sevirsə, ermənilərlə birlikdə yaşamağa razı olmalıdır"

“Əgər Qarabağ erməniləri bayrağımız altında oturub, Konstitusiyamızı qəbul edəcəklərsə, orada erməni məktəbləri də ola bilər, bələdiyyə sədrləri də ola bilər. Onsuz da Xankəndidə əlimizin altında oturacaqlar”. 

Bu sözləri yenisabah.az-a açıqlamasında Dilarə Əliyeva adına Azərbaycan Qadın Hüquqlarını Müdafiə Cəmiyyətinin sədri, hüquq müdafiəçisi Novella Cəfəroğlu deyib. 

O, Qarabağ separatçısı Tiqran Petrosyanın “Facebook” səhifəsində paylaşdığı “Qarabağ ermənilərinin inteqrasiyası layihəsi”nə münasibət bildirib. 

N.Cəfəroğlunun fikrincə, əgər onlar vətəndaşlarımız olacaqlarsa, biz onların haqlarını və təhlükəsizliklərini qoruyacağıq:

“Amma bizim vətəndaş olmalıdırlar. Məktəblərdə həm Azərbaycan dili, həm də ermənicə dərslər keçsinlər. Məgər keçmiş Dağlıq Qarabağ Muxtar Vilayətində əvvəllər onların məktəbləri yox idi? Xankəndidə erməni dilində dərs deyən institut, texnikum və məktəblər var idi. Nəyə görə qudurdular?”

“Biz həmişə müharibə qurtarsın, cavanlar ölməsin deyə güzəştə getmişik. Əgər bunlar belə şeyə razıdırlarsa, qoy, olsun. Öz dillərində də məktəbləri olsun, nə böyük şeydir? İkincisi isə Zəngəzur dəhlizi açılmalıdır. Naxçıvanla Azərbaycanın arası açılsın, Zəngəzur yolu sərbəst olsun. Bu saat bütün dünya buna göz dikib. Çünki çox gəliş-gedişli yoldu”, - əlavə edib.

“O ki qaldı sosial şəbəkələrdəki reaksiyalara, biz müharibədən çıxmış dövlətik. Sosial şəbəkələrdə bunu deyəcəklər, çünki kimin oğlu, kiminsə qardaşı ölüb. Lakin bilmək lazımdır ki, əgər biz sülh və düzgün yaşamaq istəyiriksə, barışmalıyıq. Hətta ermənilər Qarabağda qalsalar, bu, bölgədə sülh deməkdir. Çünki ən gözəl variant elə budur. Sosial şəbəkələrdə çox nahaq fikirləşirlər. Qarabağda sülhü ermənilərlə orada yaşamağından keçir”, - deyə N. Cəfəroğlu münasibətini bildirib. 

Hüquq müdafiəçisi xatırladıb ki, 44 günlük müharibə zamanı Xankəndiyə girmək imkanımız olmuşdu: 

“Amma biz müharibəni çox əxlaqla apardıq, camaata dəymədik. Ona görə ermənilər deyə bilmirlər ki, biz müharibə vaxtı onların sıravi insanlarını öldürmüşük. Amma onlar bunu edib, bu, əlimizdə bir faktdır. Onlar bizim kəndləri yandırıb, mülki camaatı öldürüblər. Ermənilər bunu nəzərə almalıdır. Ermənilər bizimlə yaşamaq üçün ölürlər, amma sülhün bərqərar olması üçün, uşaqlarımız ölməsin deyə, onlara bəzi şansları tanımalıyıq. Lakin sadaladıqlarım bizim qanunlarımız çərçivəsində olmaq şərti ilə.

Hər kim ki Azərbaycanı sevirsə, bu addımı artıq atmalıdır. Uşaqlarımız üçün atmalıyıq”.