Ermənistanın xarici işlər naziri Azərbaycanla danışıqlarda "reqres" olduğunu bildirib
Azərbaycanın sülh müqaviləsinə dair təkliflərində müəyyən reqres var. Bu barədə çərşənbə günü Ermənistanın xarici işlər naziri Ararat Mirzoyan Yerevanda mətbuat konfransında bildirib.
"Biz mətnin müəyyən bəndləri üzrə Azərbaycanın təkliflərində müəyyən reqresi, eyni zamanda bir sıra digər istiqamətlər üzrə müəyyən proqresi görürük", - Mirzoyan deyib.
Ermənistan bu bəndləri işləyib və öz təkliflərini göndərib. Növbəti təkliflər paketində reqres və ya proqresdən asılı olmayaraq, sülh müqaviləsi bir sıra prinsiplərə əsaslanmalıdır.
"Ölkələr hər hansı qeyri-müəyyənlik olmadan ərazi bütövlüyünü qarşılıqlı tanımalıdırlar. Bu, maksimum aydınlıq tələb edən məsələdir. Və yekun sülh müqaviləsi bu aydınlığı təmin etməlidir", - Mirzoyan deyib.
Delimitasiya prosesi illərlə davam edə bilər, lakin sülh müqaviləsində prosesin aparılması üçün aydın əsaslar göstərilməlidir. Bu iki məsələdə istənilən qeyri-müəyyənlik gələcək təcavüz və eskalasiyalar üçün zəmin ola bilər, Mirzoyan deyib.
Xatırladaq ki, yanvarın 4-də Yerevan sülh müqaviləsilə bağlı özünün cavab təkliflərini Azərbaycana verib. Azərbaycandan təkliflər paketi dekabrın sonunda daxil olub və iki həftə ərzində erməni tərəfi onlara cavab verib.
Rəsmi Bakı hələlik Yerevanın təkliflərini şərh etməyib.
