KOBİA 66 minlik tərcümə xidmətini İT şirkətinə həvalə etdi

Kiçik və Orta Biznesin İnkişafı Agentliyi (KOBİA) tərəfindən keçirilən tender müsabiqəsinin (Açıq tender) nəticəsi məlum olub.
Yeniavaz.com xəbər verir ki, tender müsabiqəsinin qalibi “Dasu” MMC (VÖEN – 1101344531) olub.

Müsabiqənin şərtlərinə görə “Dasu” MMC KOBİA-ya tərcümə xidmətləri göstərəcək və qarşılığında 66 min 455 manat alacaq.
Məlumat üçün bildirək ki, “Dasu” MMC 02 mart 2016-ci il tarixində dövlət qeydiyyatına alınıb. Nizamnamə kapitalı 10 manat olan MMC-nin hüquqi ünvanı Xətai rayonu, Ağ Şəhər, ev 13, 1-ci Fəvvarələr küçəsi m.123-də yerləşir. MMC-nin qanuni təmsilçisi Şiriyev Elşad Cəbrayıl oğludur.

Onu da qeyd edək ki, MMC qeydiyyatdan keçən zaman hüquqi ünvanı Qaradağ rayonu, Lökbatan ŞTQ, İntiqam Nəbiyev ev 21, m. 35-də yerləşib və qanuni təmsilçisi Vəliyeva Səbinə Telman qızı olub.

Qeyd edək ki, “Dasu” MMC-nin saytında şirkətin İT (İnformasiya Texnologiyaları) sektorunda fəaliyyət göstərdiyi bildirilir. Şirkətin tərcümə sahəsində hansı təcrübəsinin olduğu barədə məlumat mövcud deyil. “Dasu” MMC daha əvvəl də dövlət qurumlarının keçirdiyi çoxsaylı tenderlərdə qalib olub və bu tender müsabiqələrinin heç biri tərcümə xidmətləri ilə bağlı olmayıb(yeniavaz.com).