Azərbaycan-Rusiya Universiteti hansı imkanlar yaradacaq?
“Rusiya universitetlərinin xeyli hissəsi dünya universitetləri arasında yer alır. Bu da Rusiya ilə təhsil sahəsində əməkdaşlığı şərtləndirir. Bu universitetlərdə kadr hazırlığı, təcrübə mübadiləsi müsbət nəticələr verə bilər. Azərbaycanda Rusiyanın iki nüfuzlu ali təhsil müəssisəsinin filialları fəaliyyət göstərir. Bu iki universitetdə birgə tədris aparılır və kadr hazırlığı yüksək səviyyədədir. Azərbaycan-Rusiya Universitetinin yaradılması da bu işlərdən biri ola bilər. Bu həm də iki ölkənin əməkdaşlıq imkanlarını daha da inkişaf etdirəcək. Bu gün bizim xeyli sayda gəncimiz Rusiyada təhsil alır. Birgə universitet isə təhsil sahəsində əməkdaşlığa əlavə töhvə verəcək".
Bu fikirləri bakupost.az -a açıqlamasında Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov deyib.
O bildirib ki, Azərbaycan-Rusiya Universitetinin açılması vətəndaşlarımızın dünyanın ən böyük əmək bazarı olan Rusiyada vacib məqamlarda yer almasına imkanlar yaradacaq:
“Azərbaycanla Rusiya arasında bütün sahələrdə əməkdaşlığın gücləndirilməsi vacibdir. Prezident uzaqgörənliklə Rusiya ilə Azərbaycan arasında strateji tərəfdaşlıq və müttəfiqliyi inkişaf etdirir. Rusiya Azərbaycanla qonşu və tərəfdaş dövlətdir. Bizim çox sayda soydaşımız Rusiyada işləyir, yaşayır. Ona görə də, Rusiya ilə təhsilin fərqli pillələrində əməkdaşlığa zərurət var”.
