AZAL-ın qəzaya uğrayan təyyarəsi ilə bağlı hesabat dekabra qədər hazır olacaq
“Azərbaycan Hava Yolları” QSC-nin (AZAL) təyyarəsinin qəzaya uğraması ilə bağlı istintaq hesabatı 2025-ci ilin dekabr ayına qədər hazır olacaq.
Qazaxıstan KİV-lər xəbər verir ki, bu barədə nəqliyyat nazirinin müavini Talqat Lastaev Astanada keçirilən mətbuat konfransında bildirib.
“Beynəlxalq Mülki Aviasiya Təşkilatının (ICAO) tələblərinəŞ standartlarına və tövsiyə olunan təcrübələrinə uyğun olaraq, istintaq bir il davam edir. Buna görə də, yekun istintaq hesabatı 2025-ci ilin dekabr ayına qədər tamamlanacaq”, - deyə Lastaev qeyd edib.
Xatırladaq ki, qəza ötən il dekabrın 25-də Qazaxıstanın Aktau şəhəri yaxınlığında baş verib. Təyyarənin göyərtəsində olan 67 nəfərdən 38-i həlak olub, 29 nəfər isə sağ qalıb. İlkin məlumatlara görə, təyyarə Rusiyanın Qroznı üzərindəki hava məkanında baş verən fiziki və texniki xarici müdaxilə nəticəsində qəzaya uğrayıb.
