"AYNA, siz bu cəriməni haranızdan uydurub çıxardınız?" - FOTO
Tanınmış iqtisadçı-ekspert, Respublikaçı Alternativ (REAL) Partiyasın sədri Natiq Cəfərli ona qanunsuz cərimə yazıldığını iddia edib.
O, bu barədə sosial şəbəkə hesabında yazıb.
“İnsanları bezdirən, yığdığı vəsait haqqında ictimai məlumat verməyən, yığdığını kefi istəyən kimi xərcləyən AYNA – Azərbaycan Yerüstü Nəqliyyat Agentliyi, sizdən indicə mesaj aldım, bugünkü tarixdir (19 aprel – red.), bu gün maşını heç yerdə saxlamamışam, evdən çıxıb ofisə gəlib ofisin qarşısında maşını park etmişəm, ofisin qarşısı binaya aiddir, şlaqbaumla daxil olmaq olur – maşın 7 saatdır ofisin qarşısındadır, yaxşı, siz bu cəriməni haranızdan uydurub çıxardınız?”, - N. Cəfərli bildirib.
O qeyd edib ki, çağrı mərkəzinə zəng etsə də, danışa bilməyib:
“4 dəqiqə gözlətdiniz, sonra qapatdınız. Sizi məhkəməyə verəcəm, yetər artıq, insanları zinhara gətirmisiniz!”
Ekspert bir müddət sonra qurumdan ona zəng edildiyini yazıb:
“Məsələni araşdırırlar, amma bu problemlər yüzminlərlə sürücüləri əhatə edir deyə, fərdi yox, sistemli həll olunmalıdır”.
