Araz Musayev sui-qəsdə görə Adil Əliyevi ittiham edir
Bir neçə gün əvvəl Türkiyədə sui-qəsdə məruz qalan Azərbaycan Muay-Tay Federasiyasının prezidenti, 9 qat dünya çempionu Araz Musayev, nəhayət, özünə gəlib. O, mediaya açıqlama verərək Kinboksinq Federasiyasının rəhbərliyini, yəni Adil Əliyevi ona sui-qəsd təşkil etməkdə suçlayıb:
"Azər Həsənsoy və Elşən Abdulrəhimov ezam olunmuşdular ki, burada federasiyanı məndən alsınlar. Gəldilər, burada da mümkün olmadı. Əksinə, Kikboksinq Federasiyası dünya tərəfindən mənim nəzarətimə verildi. Ondan sonra istədilər dava salsınlar, gördülər alınmır. Ondan sonra killer göndərib məni vurdular".
Araz Musayev onu da deyib ki, Gənclər və İdman Nazirliyinin şöbə müdiri Elnur Məmmədovun Kikboks və Muay-Tay idman növündən xəbəri olmadığı üçün verdiyi qeyri-qanuni qərarlar, Dünya Muay-Tay Fedarasiyası tərəfindən Kikboksinq Federasiyası idmançılarının Muay-Tay Fedarasiyasının tərkibinə daxil edilməsi ilə nəticələndi. Musayevin sözlərinə görə, ona beşbarmaqla üzündən, bıçaqla isə başından və bədənindən iki zərbə vurublar:
"Ötən gün axşam əməliyyat olunmuşam. Vəziyyətim orta-ağırdır. Bu federasiyaya dəstək verən Gənclər və İdman Nazirliyinin şöbə müdiri Elnur Məmmədovdur. Türkiyə polisi Azər Həsənsoyla Elşən Abdulrəhimovu saxlayıb. Hadisəni törədənlər Rusiyadan göndərilən adamlardır. Mən də buna hazırlıqlı idim…".
Məlumata görə, Araz Musayev istintaqa ilkin ifadə verib və hazırda Suraxanı RİH-nin başçısı vəzifəsində çalışan Adil Əliyevi bütün baş verənlərdə günahkar bilib. Artıq bu qalmaqallı sui-qəsd məsələsinin ölkə rəhbərliyinədək gedib çıxdığı deyilir. İstintaq isə davam edir…
