Komadan ayılan Bəhram Bağırzadənin son vəziyyəti - Həkim danışdı

"Bəhram Bağırzadənin səhhətində dünəndən bu günə ciddi dəyişiklik yoxdur".

Bunu "BakuPost"a açıqlamasında aktyorun yerləşdirildiyi Mərkəzi Gömrük Hospitalı rəisinin müalicə işləri üzrə müavini Bəxtiyar Musayev deyib.
Həkim aktyorun səhhətində müsbət dinamikanın davam etdiyini bildirib.
Xatırladaq ki, daha əvvəl koronavirus xəstəliyindən müalicə olunduğu xəstəxanadan iyunun 13-də Mərkəzi Gömrük Hospitalının Reanimasiya şöbəsinə köçürülən əməkdar artist Bəhram Bağırzadənin ağciyər toxumasının 90%-dən çox zədələndiyi məlum olmuşdu. Mərkəzi Gömrük Hospitalının cərrahları və reanimatoloqları təcili olaraq gecə konsilium keçirib və xəstənin ECMO cihazına qoşulmasına qərar vermişdi. Xəstənin ECMO cihazına qoşulması əməliyyatından sonra onun vəziyyəti nisbətən stabilləşmiş və saturasiya 95 faizə qədər yüksəlmişdi.
Üç gün öncə B.Bağırzadənin ECMO cihazından ayrıldığı açıqlanmışdı. Dövlət Gömrük Komitəsi Tibbi Xidmət İdarəsinin “Elmi Təcrübi və Tədris Mərkəzi”nin rəisi Dr. Rəşad Mahmudov onun dərmanlar vasitəsilə dərin koma vəziyyətində yatızdırıldığını, hələ ki, komadan oyandırılması cəhdi düşünülmədiyini demişdi.

Lakin ötən gün onun huşunun özünə gəldiyi açıqlanıb.