Rusiya Qarabağdakı sülhməramlı əməliyyatlara zərbə vertolyotları da cəlb edir

Rusiya Müdafiə Nazirliyi Dağlıq Qarabağdakı sülhməramlı əməliyyatlarda Mi-8 hərbi-nəqliyyat və Mi-24 zərbə vertolyotlarının da istifadə ediləcəyini açıqlayıb.

“Hərbi-nəqliyyat aviasiyasının An-124 “Ruslan” təyyarəsi ilə Yerevanın “Erebuni” aerodromuna Rusiya Hava Kosmik Qüvvələrinin 8 ədəd Mi-8 və Mi-24 vertolyotları çatdırılıb. Vertolyotlar sülhməramlı əməliyyatın keçiriləcəyi rayonda atəşin və hərbi əməliyyatların dayandırılmasına nəzarəti həyata keçirəcək, habelə çətin keçilən rayonlara sülhməramlı kontingentin şəxsi heyətini və maddi-texniki vasitələri çatdıracaq”,-Rusiya Müdafiə Nazirliyi bildirir.

Xatırladaq ki, Rusiya, Azərbaycan və Ermənistan rəhbərləri arasında əldə edilmiş üçtərəfli razılaşmada münaqişə zonasında Rusiyanın 1980 nəfərdən ibarət sülhməramlı kontingentinin, eləcə də 90 zirehli transportyorun, 380 vahid avtomobil texnikasının və xüsusi texnikanın yerləşdirilməsi nəzərdə tutulurdu. Ötən gün isə Rusiya Baş qərargahının Əməliyyat İdarəsinin rəisi, general-polkovnik Sergey Rudskoy Qarabağda sülhməramlı kontingenti ordu aviasiyasının və pilotsuz uçan aparatların da dəstəkləyəcəyini açıqladı.