Moskvada yaşayan azərbaycanlı iş adamı hərbçinin banka olan borcunu bağladı

44 gün davam edən 2-ci Qarabağ döyüşlərində düşmənə qarşı göstərdiyi qəhramanlıqla ad çıxaran, sosial şəbəkələrdəki videoları ilə məşhurlaşan XTQ-nin 31 yaşlı zabiti Əli Kərimovun banka olan kredit borcunu Moskvada yaşayan gənc iş adamı Xəzər Qarayev tam ödəməyi öz üzərinə götürüb. 
Qeyd edək ki, Xəzər Qarayev uzun illər fəal diaspora fəaliyyəti ilə məşğuldur, o, hal-hazırda Moskva Azərbaycanlıları İcmasının icraçı direktorudur.

Onu da vurğulayaq ki, gənc həmvətənlimiz dünyanı cənginə alan COVİD-19 pandemiyası dövründə də davamlı olaraq, Rusiyadakı və Azərbaycandakı soydaşlarımıza maddi dəstək göstərib. X.Qarayev həm Silahlı Qüvvələrə Yardım Fonduna müəyyən miqdarda vəsait köçürməklə yanaşı, cəbhədə döyüşən zabit və əsgərlərimizin ailələrinə də ayrı-ayrılıqda maddi dəstək göstərib.

X.Qarayev bildirib ki, Əli Kərimovun döyüşlərdə düşmən zabitini və onlarla düşmən əsgərini öldürməsi, özü yaralı olduğu halda yaralı əsgər yoldaşını 17 km məsafəyə qədər çiynində daşıyaraq onun yaşamasına nail olması onu qürurlandırıb.

Qəhraman zabitimiz skayp vasitəsi ilə Xəzər Qarayevlə danışan zaman ona bu diqaətinə görə təşəkkür etsə də, X.Qarayev təşəkkürə ehtiyac olmadığını, Əli kimi qəhraman əsgərlərimizin Vətən uğrundan canlarını ortaya qoyaraq düşməni diz çökdürmələri qarşılığında onların daha çox diqqətə layiq olduğunu bildirib.

Redaksiya olaraq Xəzər Qarayevə bu nəcib addımına görə biz də təşəkkür edirik. 

Veteninfo.az