Şəhid Milli Qəhrəmanın ailəsi illərdir kirayədə yaşayır – həyat yoldaşı danışır
Şəhid Milli Qəhrəman Nofəl Quliyevin ailəsi kirayədə yaşayır.
Bu barədə “Azsiyasət.com” saytının redaksiyasına informasiya daxil olub. Məsələ ilə bağlı saytın əməkdaşı Milli Qəhrəman Nofəl Quliyevin həyat yoldaşı Furadan Xəlilova ilə əlaqə saxlayıb.
F.Xəlilova bildirib ki, hazırda bir oğlu və iki nəvəsi ilə kirayədə yaşayır:
“Vəziyyətimiz yaxşı deyil, evsiz qalmışıq. Hazırda Nəsimi rayonu Asif Məhərrəov küçəsi 174, mənzil 101-də oğlumla, nəvələrimlə kirayədə yaşayırıq, ayda 450 manat kirayə pulu verməyə məcburuq. Xahiş edirəm, mənə kömək olunsun. İnanıram ki, Cənab Prezidentin, Mehriban xanımın məlumatı olsa, bizi mənzillə təmin edəcəklər. 2017-ci ildən Nəsimi Rayon İcra Hakimiyyətində ev növbəsindəyəm. Dövlətdən heç vaxt ev almamışıq, öz evim var idi, orada yaşayırdıq. Amma problemlər ucbatında satdıq. İndi kirayələrdəyik”.
Məsələ ilə bağlı Nəsimi Rayon İcra Hakimiyyəti ilə əlaqə saxladıq. Təəssüf ki, telefonlara cavab verən olmadı.
Azərbaycanın ərazi bütövlüyü uğrunda xeyli sayda erməniləri məhv edərək qəhrəmancasına şəhid olan Nofəl Quliyevin ailəsinin mənzillə təmin olunması üçün məsələni diqqətdə saxlayacağıq.
Xatırladaq ki, Quliyev Nofəl Zahid oğlu 1963-cü ilin oktyabr ayının 4-də Şirvan şəhərində (keçmiş Əli Bayramlı) dünyaya göz açıb. 1971-ci ildə Şirvan şəhər 9 saylı orta məktəbinin birinci sinfinə gedib, 1981-ci ildə təhsilini başa vurub. 1982-ci ildə N.Quliyev ordu sıralarına çağrılıb. 1984-cü ildə əsgəri xidmətini başa vurub, bir müddət Bakı Məişət Kondisionerləri Zavodunda çalışıb. Quliyev Nofəl 1984-cü ildə ailəsi ilə birlikdə Tümen şəhərinə köçür, burada işləyə-işləyə tikinti texnikumuna daxil olur. Altı il burada yaşadıqdan sonra doğma yurda dönür. Nofəl Quliyev iş üçün Respublika Daxili İşlər Nazirliyinə müraciət edir. Bakıya daimi pasport qeydiyyatı olmadığı üçün onu işə qəbul etmirlər. O, Bakıdakı tikinti idarələrindən birinə işə düzəlir. Bir müddətdən sonra yenidən DİN-nə müraciət edir. Çox çətinliklərdən sonra onu sıravi polis nəfəri kimi işə qəbul edirlər. Nofəl tez-tez döyüş bölgələrində ezamiyyətdə olurdu. Bu səfərlər adətən 10-15 gün çəkirdi. 1991-ci ilin soyuq dekabr ayında Goranboyun Todan kəndi erməni yaraqlılarının güclü hücumuna məruz qalmışdı. N.Quliyev yenə dostları ilə birlikdə silaha sarılaraq döyüşə yollandı. Qüvvələr nisbəti düşmən xeyli üstün idi. Buna baxmayaraq, cəsur döyüşçülərimiz kəndin bir qarış torpağının belə düşmən əlində qalmasına imkan vermək istəmirdilər. Ermənilər xeyli canlı qüvvə itirmişdilər və artıq geri çəkilirdilər. Nofəl yaxınlıqdakı yüksəklikdə özünə mövqe seçməklə ermənilərin yolunu kəsmişdi. Cəsur döyüşçü N.Quliyev son damla qanma qədər vuruşub çoxlu erməni faşistini məhv etdi və özü də qəhrəmancasına şəhid oldu. Azərbaycan Respublikası Prezidentinin 6 iyun 1992-ci il tarixli 831 saylı Fərmanı ilə Quliyev Nofəl Zahid oğluna (ölümündən sonra) "Azərbaycanın Milli Qəhrəmanı" adı verilmişdir. Ailəli idi. Bir övladı yadigar qalıb. N.Quliyev Şirvan şəhərində, Şəhidlər Xiyabanında dəfn edilib. Şirvan şəhər 9 saylı orta məktəb Qəhrəmanın adını daşıyır.
