"İş yerləri bağlanıb, çoxlu sayda insan işsiz qalıb" - Deputat hökumətə çağırış etdi

"Pandemiyaya görə özəl sektorda iş yerləri bağlanıb, çoxlu sayda insan işini itirib. İşsizliyə görə sığorta ödənişi ilə təmin olunan şəxslərin sayı isə olduqca azdır".

Azsiyasət.com xəbər verir ki, bunu Milli Məclisin bu gün keçirilən iclasında deputat Fazil Mustafa bildirib. 

Deputat hökumət üzvlərinə müraciət edərək, işsiz əhalinin sayının artdığını, buna şərait yaradan hallara, qanunvericilikdəki boşluqlara baxmağı xahiş edib.

Ölkədə boşanma hallarının artmasına diqqət çəkən F. Mustafa, məktəblərdə təhsilin səviyyəsinin düşdüyünü bildirib: “Burada obyektiv və subyektiv səbəblər də var. Bir sıra yerlərdə mədəniyyət evləri fəaliyyət göstərmir. Sökülən mədəniyyət evlərinin əraziləri ayrı-ayrı şəxslərə sot-sot satılır. Birinci Vitse-prezident Mehriban Əliyevanın həssaslığı olmasaydı, bir çox məmur mədəniyyət evlərinin ərazisini də satardı. Gənclər evlərinin, digər mərkəzlərin də boş qalması dövlətə heç bir fayda vermir. Mədəniyyət Nazirliyi ilə birlikdə bu prosesə başlamaq lazımdır".

Deputat daha sonra bildirib ki, ölkədə 47 olimpiya kompleksi fəaliyyət göstərir: 

"Onlar dövlət büdcəsi hesabına tikilib. Ancaq qapısı bağlı, fəaliyyətsiz qalıb. Cəfər Cabbarlı adına kinostudiyanın ətrafı ancaq restoran, kafe, barlardr. Hansı ölkədə belə vəziyyət var?! Postpandemiya dövründə bu problemlər həllini tapmalıdır. Pilot layihələri iflasa uğrayıb. Bunun çarəsini tapmaq lazımdır”- deyə, millət vəkili əlavə edib.