Kapital Bank xərçəng xəstəsi olan müştərinin problemini həll etmir: "Ört-basdır etməyə çalışırlar"
Bir neçə gün əvvəl “Kapital Bank”la Türkan Quliyeva adlı vətəndaş arasında yaranan problem hələ də həllini tapmayıb.
Valideyni onkoloji xəstə olduğu üçün kartının bank tərəfindən yenilənməməsindən şikayətçi olan xanım yenisabah.az-a açıqlamasında bildirib ki, yaranmış xoşagəlməz vəziyyət bank əməkdaşının kobudluğu kimi qələmə verilməyə çalışılır, lakin problem bankın prosedurlarındadır:
“Bəli, bizimlə əlaqə saxlanılıb və üzr istənilib. Amma məsələ həll olunmayıb. Hadisə bank əməkdaşının kobudluğu kimi qələmə verilməyə çalışıldı, lakin biz buna qəti olaraq qarşıyıq. Bu hadisədə o əməkdaşın heç bir günahı yoxdur. Problem bankın prosedurlarındadır. “Biz məsələyə baxdıq, əlaqə saxladıq”,- deyib məsələ ört basdır olunmağ çalışılır. Bizə bank kartının verilib-verilməyəcəyi barədə heç nə deyilmədi”.
Xatırladaq ki, üç gün əvvəl Türkan Quliyeva sosial şəbəkədə “Kapital Bank”la bağlı narazılığını dilə gətirib.
Onun sözlərinə görə, bankın Yasamal filialına yaxınlaşan anasına bütün bank şərtlərini ödəməyinə baxmayaraq, kart təhvil verilmədikdən əvvəl, "Siz xərçəng xəstəsisiniz. Sizin kartınızı yeniləyə bilmərik.", -deyilib.
Saytımıza açıqlama verən “Kapital Bank”ın İctimaiyyətlə Əlaqələr şöbəsinin rəisi Pərviz Sədrəddinov isə hadisənin araşdırıldığını və nəticə barədə ailənin özünə məlumatın təqdim edildiyini vurğulayıb.
