YPX əməkdaşlarından daha bir özbaşınalıq - "Sürücülərdən 20 manatdan pul yığır" - FOTOLAR

Yol polisi əməkdaşlarının qanunsuz əməlləri ilə bağlı sosial şəbəkələrdə demək olar ki, hər gün müxtəlif məlumatlar yayılır. Belə məlumatlardan birini Rafael Bayramov adlı Facebook istifadəçisi paylaşaraq, YPX tərəfindən qanunsuzluğa məruz qaldığını bildirib.

O, Daxili İşlər naziri Vilayət Eyvazova müraciət edərək YPX əməkdaşının cəzalandırılmasını istəyir. 

Azsiyasət.com vətəndaş R.Bayramovun YPX-nin özbaşına hərəkətləri ilə bağlı paylaşımını olduğu kimi təqdim edir: 

"Azərbaycan Respublikası Daxili işlər naziri Cənab Vilayət Eyvazova müraciət:

Yazıb sizə bildirmək istəyirəm ki, idarə etdiyim "Ravon nexia" markalı 90 PL 712 dövlət qeydiyyat nişanlı avtomobillə 20.04.2021 ci il tarixdə saat 12:25 radələrində Qaradağ rayonu ərazisində Lökbatan yolu ilə Qaradağ RPİ-dən üzü Lökbatan istiqamətinə hərəkət edərkən qarşı tərəfdən əks istiqamətdə hərəkət edən 99 YP 258 YPX əməkdaşı mənə saxla əmri verib dönüb arxamda dayandı. Ölkədə xüsusi karantin rejimi olmağına baxmayaraq inspektor tamamilə maskasız və əlcəksiz mənə yaxınlaşaraq, lizinq maşın sürdüyümdən sənədlərimi yoxlamaq istədi. Mən isə inspektorun niyə maskasız və əlcəksiz olduğunu bildirdikdə açıq havada olar deyib, əlavə olaraq qoşa xətdən döndüyümü iddia etdi. Nəhayət sənədlərimi təqdim etdim. Daha sonra inspektor gedib YPX maşınında bir qədər əyləşib mənə iddia etdiyi cəriməni yazıb gətirib sənədlərimi qaytardı. Protokolu təqdim etmədi və şikayətçi olduğumu bilərək qərar yerini də özü qərarlaşdırdı. İnspektorun maskasız və əlcəksiz mənə yaxınlaşmağı idarə etdiyi 99 YP 258 YPX avtomobilinin ön kameralarında var. Əlavə olaraq bildirmək istəyirəm ki, həmin inspektor gün ərzində yalnız bu yol ilə hərəkət edir və saxladığı maşınlardan 20 AZN "qoşaxətt" pulu alır. Bir dəfə özüm 20 AZN verməklə, bir çox tanıdığım insanlar da eyni inspektor və eyni YPX maşınına bu hal ilə 20 AZN verib əsassız cərimələrdən xilas olublar".

R.Bayramov daha sonra qeyd edir:

"Sizdən (Nazir Vilayət Eyvazovdan - red.) xahiş edirəm ki, bu hal araşdırılsın və həmin YPX inspektoru qanuni cəzalandırılsın. Axırıncı hadisə ilə bağlı sübut üçün hadisə yerində foto çəkilişlər etmişəm və sizə göndərmişım. Müraciəti qəbul etdiyiniz üçün əvvəlcədən təşəkkür edirəm.

P.S. Adam YPX maşınında həmişə tək fırlanır ki, saxladığı sürücü gəlib əyləşsin YPX avtomobilinə və 20-liyin versin...". 

Azsiyasət.com