"Greencard Azərbaycan" dələduzluq edir? - "Təsdiq nömrələrini özlərində saxlayıb 800 dollar tələb edirlər..."
"Ölkəmizdə fəaliyyət göstərən "Greencard Azərbaycan" şirkəti hər il on minlərlə insanı öz tələsinə salaraq istismar edir. Belə ki, lotereyada iştirakçı olmaq istəyən şəxslər natamam məlumatlarla aldadılaraq bu şirkətin saytından qeydiyyatdan keçirlər. Şirkət il ərzində insanların şəxsi məlumatlarını toplayıb oktyabr-noyabr aylarında onların yerinə rəsmi saytdan qeydiyyatdan keçir və təsdiq nömrəsini özündə saxlayır. Növbəti ilin may-iyun aylarında nəticələr elan olunduqda isə qalib gələn şəxslərə ancaq onların tələb etdiyi məbləğ (minimum 800 dollar) ödəniləcəyi halda təsdiq nömrələrini verəcəklərini deyirlər. Bu məbləğ ödənilmədiyi halda isə şirkət iştirakçını cərimə olunacağı ilə hədələyir".
Azsiyasət.com xəbər verir ki, bunu azpolitika.info-a Fərid Əliyev bildirib. O, Amerika Birləşmiş Ştatlarının Azərbaycan Respublikasındakı səfiri Örl D. Litzenberqerə, səfirliyi əməkdaşlarına, Azərbaycan Respublikasının Baş Prokurorluğu və Daxili İşlər Nazirliyinə bu barədə etdiyi müraciətinin mətbuatda da işıqlandırılmasını istəyir.
F.Əliyevin sözlərinə görə, saytın müxtəlif yerlərində “green card” müraciətinin ödənişsiz olması qeyd olunur, digər tərəfdən "Xidmət Şərtləri" adlı bölmədə qalib gələn şəxsin şirkətə ödəniş etməli olduğu yazılır:
"Şirkətin "Xidmət Şərtləri" adlı mətninə ancaq bir neçə nəzərə az çarpan linklərə daxil olduqdan sonra çatmaq olur. Şərtlərin 9-cu bəndində qalib gələn iştirakçının "şirkətin xidmətləri"ndən istifadə etdiyi üçün minimum 800 dollar ödəniş etməyi öhdəsinə götürdüyü yazılır. Bu məbləğin qarşılığında isə konsultasiya xidmətindən faydalana biləcəyi qeyd olunur. Bəs əgər şəxs konsultasiya almaq istəmirsə? Əhəmiyyəti yoxdur, yenə də 800 dollar ödəniş edilməlidir. Məsələnin əsl mahiyyəti konsultasiya vermək deyil, iştirakçının özünə aid olan təsdiq nömrəsini ona pul qarşılığında satmaqdır".
Şikayətçi daha sonra qeyd edir ki, təsdiq nömrəsini iştirakçıdan gizli saxlamaq, bunu ona pul qarşılığında satmaq lotereyanı keçirən ABŞ Dövlət Departamentinin rəsmi saytında "fraud" (dələduzluq) olaraq qeyd olunur.
"Məhz elə buna görə də, ABŞ-ın ölkəmizdəki səfirliyi şirkətin saxtakarlığı barədə məlumatlarla çıxış edib, bu məsələ çox sayda xəbər portallarında işıqlandırılıb. 2021-ci ilin may ayında qeydiyyat prosesi 2020-ci ilin oktyabr-noyabr aylarında baş tutmuş lotereyanın nəticələrinin elan olunacağı gözlənilir. Yenə də "Greencard Azərbaycan" şirkəti özündə girov olaraq saxladığı və alver predmetinə çevirdiyi təsdiq nömrələrini öz həqiqi sahiblərinə satmağa başlayacaq", - deyə F. Əliyev vurğulayıb.
O, bütün bunları nəzərə alaraq "Greencard Azərbaycan" şirkətinin fəaliyyətinin araşdırılması, şirkətin özündə saxladığı lotereya iştirakçılarının şəxsi məlumatlarının öz sahiblərinə ödənişsiz qaydada təqdim olunması və sözügedən şirkətin qarşıdan gələn qeydiyyat dövrlərində də bu və ya digər formada hüquqazidd əməllər törətməsinin qarşısının alınması istiqamətində zəruri tədbirlərin görülməsini xahiş edir.
Qeyd olunan ittihamlarla bağlı şirkətin də mövqeyini işıqlandırmağa hazırıq.
