"İdarə rəisinin kürəkəni və oğlu məni ölümlə hədələyir..." - Ucar sakini
28 may tarixli sayımızda Ucar rayonu H.Əliyev prospekti ev 136 ünvanında yaşayan Şirinov Raqif Ayaz oğlunun ölkə rəhbərliyinə ünvanladığı məktubu dərc etmişdik. Həmin məktubda Ucarda torpaqların sürətlə şoranlaşmasından və bunun qarşısını almalı olan Ucar Rayon Meliorasiya İdarəsinin rəhbərliyinin fəaliyyətsizliyindən söz açılırdı.
Şikayətçi bildirirdi ki, idarə rəisi birbaşa vəzifəsilə məşğul olmaq, rayon torpaqlarının şoranlaşmasının qarşısını almaq əvəzinə bizneslə, fermer təsərrüfatı ilə məşğul olur, rayon ərazisindəki torpaq sahələrini zəbt edir:
“Ucar rayon Meliorasiya İdarəsinin müdiri Həsən Qasımovun başı korrupsiya əməllərinə qarışdığından rayon torpaqlarını şoranlıq ağuşuna alıb, kənd təsərrüfatı məhv olmaq üzrədir. Nəticədə, Ucar ərazisində torpaqlar əkinə yararsız hala düşür, dövlətə və vətəndaşlara külli miqdarda ziyan dəyir. Ucar rayon Meliorasiya İdarəsinin bütün texnikaları Həsən Qasımovun şəxsi təsərrüfatında işlərə cəlb edilib. Hansı ki, həmin texnikalar rayon ərazisində olan kanalların təmizlənməsinə və digər əhəmiyyətli işlərə cəlb edilməlidir...”
Redaksiyamıza yenidən müraciət edən Raqif Şirinov bu dəfə etdiyi şikayətlərə görə Ucar Rayon Meliorasiya İdarəsinin rəisi Həsən Qasımovun öz yaxınları vasitəsilə ona hədə-qorxu gəldiyini, təhqir etdirdiyini yazıb:
“Ucar rayon Meliorasiya İdarəsinin müdiri Həsən Qasımovun korrupsiya əməlləri barədə video və foto faktlarla şikayət etdikdən sonra məni ölümlə hədələtdirir və nalayiq söyüşlərlə təhqir etdirir. Belə ki, 29 may 2021-ci il tarixdə Həsən Qasımovun kürəkəni, "Azərişıq" ASC-nin yüksək vəzifəli əməkdaşı Səlimov Zaur Qurban oğlu mənə dəfələrlə zəng edərək, ölümlə hədələdi və nalayiq şəkildə təhqir etdi. Bunu təsdiq edən səs yazısını təqdim edə bilərəm. Mən bu barədə 102 xidmətinə zəng edib məlumat verdikdən sonra Ucar Rayon Polis Şöbəsinin Yusif adlı zabiti mənim izahatımı aldı. Həmin vaxt Zaur Səlimov mənə zəng edəndə Yusif adlı polis zabiti mənim telefonuma gələn zəngə cavab verdi. Zaur Səlimov məni və polis zabitini nalayiq söyüşlərlə təhqir etdi.”
Şikayətçi qeyd edir ki, idarə rəisinin oğlu da onu hədələyərək, təhqir edib:
“Həmçinin, Ucar rayon Meliorasiya İdarəsinin müdiri Həsən Qasımovun oğlu “Ucar Meliorasiya Servis”də mühəndis işləyən Nicat Qasımov da mənə dəfələrlə zəng edərək, ölümlə hədələyib və təhqir edib. Həsən Qasımov və onun ailə üzvləri dövlət qanunlarını saya salmırlar...”
Sonda bir daha ölkə rəhbərliyinə və hüquq-mühafizə orqanlarına müraciət edən Ucar sakini idarə rəisi barədə ölçü götürülməsini və onun əməllərinin araşdırılmasını xahiş edib.
Azpolitika.info
