SOCAR-ın Texniki Təchizat İdarəsində yoxlamalar başlayacaq - Oliqarxa çevrilən təchizatçılar - SİYAHI
Bu ilin fevral ayının 10-da Rövnəq Abdullayev SOCAR-ın prezidenti vəzifəsindən kənarlaşdırılandan sonra ölkənin “neft nazirliyi”ndə (oxu: Dövlət Neft Şirkəti) maraqlı proseslər müşahidə olunmaqdadır.
Məlumdur ki, Prezident İlham Əliyev ölkə həyatının bütün sahələrində ciddi islahatlara start verib. Bu islahatlar kursu SOCAR-dan yana keçə bilməzdi. Bu baxımdan 2005-ci ildən Azərbaycanın “neft nazirliyi”nə rəhbərlik edən R.Abdullayevin vəzifədən uzaqlaşdırılmasını mühüm hadisə adlandırmaq olar. Çünki 17 il ərzində ölkənin ən böyük maddi sərvətləri üzərində hökmə sahib olan R.Abdullayev ölçüyəgəlməz dərəcədə böyük pullar və sərvət toplamışdı.
Artıq SOCAR-da yeni rəhbərlik formalaşıb. Yeni komanda üzvlərinin bu qurumda da təyinat alması ümidverici siqnallar verir.
Azsiyaset.com-a daxil olan məlumata görə, yaxın günlərdə SOCAR-ın texniki təchizat məsələlərinə (müxtəlif trest və idarələr üzrə) baxan şəxslərlə bağlı ciddi araşdırmalar başlayacaq.
Şübhəsiz ki, SOCAR-ın təmizlənməsi və orada ciddi islahatların aparılması qaçılmazdır. Amma bu islahatlar kosmetik deyil, köklü xarakter daşımalıdır. Məsələn, uzun illər bu qurumda müxtəlif vəzifələrdə çalışan, xüsusilə də, R.Abdullayevin qohumlarından, kəndçilərindən ibarət olan şəxslər təkcə vəzifədən çıxarılmalı deyil, həm də onların neçə illik fəaliyyəti hüquqi şəkildə təftiş edilməlidir.
Hesab edirik ki, Qarabağın bərpasının sürətlə aparıldığı bir ərəfədə hüquq-mühafizə orqanları bu şəxslərin sahib olduqları hüdudsuz biznes şəbəkələrini araşdırmalı, dövlətdən oğurlanan külli miqdarda pullar büdcəyə yönəldilməlidir.
Heç kəsə sirr deyildir ki, SOCAR-da ən pullu və prestij sayılan idarələrdən biri Texniki-təchizat idarəsi idi. Bu idarənin rəisi isə hələ də R.Abdullayevin bacanağı Mehman Əkbərovdur. M.Əkbərovun Azərbyacanda və xaricdə sahib olduğu sərvətlər barədə zaman-zaman dövri mətbuatda da məlumatlar yer alıb.
2010-cu ildən “Neftqaztikinti” Trestinin direktoru Mirkazım Abasov neft sahəsində mütəxəssislərdən sayılır. Amma bu amil onun qanunsuz əməllərinə bəraət verə bilməz. Belə ki, M.Abasov SOCAR-da ən varlı şəxslərdən biri sayılır.
“Neftqaztikinti” Trestinin şöbə müdiri Rüfət Cəfərov da bu qurumda oliqarxa çevrilən neft məmurlarından biri hesab olunur. Arxa planda yer alan R.Cəfərovun adı ilk dəfədir ki, mətbuatda və bu məqalədə yer alır. Azərbaycanda və xarici ölkələrdə xeyli sayda mal-mülkə sahiblənən bu adam R.Abdullayevə yaxınlığı ilə seçilir. Heç bir dərin təcrübəsi olmayan R.Cəfərovun uzun illər öncə mühüm posta gətirilməsi də məhz R.Abdullayev amili ilə bağlı olub.
Adıçəkilən bu şəxslərlə bağlı redaksiyamızda ilginc və etibarlılığı şübhə doğrumayan məlumatlar da var. Bu şəxslərin Bakıda, rayonlarda və xarici ölkələrdə əldə etdiyi mülklərə dair foto və sənədlərin olması əlimizi daha da gücləndirir. Bütün bunları dərc etməyə hələki tələsmirik.
İnanırıq ki, SOCAR-dakı yeni komanda bu şəxslərlə bağlı lazımı addımların atılmasını əsas prioritet kimi qarşıya qoyacaqdır.
Ramil Şaxtaxtinski
Azsiyaset.com
