NATO Baş kaibi Türkiyənin strateji əhəmiyyətindən danışdı
Finlandiya və İsveçin NATO-ya daxil olması ilə bağlı qərarlar tez qəbul edilməlidir.
Bunu NATO-nun Baş katibi Yens Stoltenberq Danimarkada Baş nazir Mette Fredriksenlə keçirdiyi mətbuat konfransında deyib.
O bildirib ki, NATO-da fikir ayrılıqları var və bu yeni deyil, problemlər həll olunacaq.
"Türkiyə ilə dialoq aparırıq. Türkiyənin ifadə etdiyi narahatlıqları müzakirə edirik. Biz etiraf etməliyik ki, Türkiyə mühüm NATO ölkəsidir və onun xüsusi təhlükəsizlik problemləri var. Ona görə də biz oturub həll yolu tapmağa çalışırıq”, - deyə Stoltenberq qeyd edib.
Xatırladaq ki, Finlandiya və İsveç NATO-ya qoşulmaq istəsə də, Türkiyə buna icazə vermir. Rəsmi Ankara bu iki ölkənin NATO-ya qoşulmasına qəti şəkildə razı deyil. Səbəb olaraq Finlandiya və İsveçdə PKK-nın terror təşkilatı kimi tanınmaması, FETÖ terrorçularının Türkiyəyə qaytarılmasına rədd cavabının verilməsi göstərilir. Qardaş Türkiyə mövqeyini israrla müdafiə edərək, Finlandiya və İsveç qarşısında 10 təklifdən ibarət şərtlər qoyub. Əgər adları çəkilən ölkələr Türkiyənin şərtlərini qeyd-şərtsiz qəbul etsələr, NATO-ya üzv olmaq şansı qazana bilərlər.
