Bakıda evi yanan 3 uşaq anası küçədə qalıb - "Qala Sığorta" ödənişi etmir

Bakıda evi yanan qadın 3 uşaqla küçədə qalıb. 3 ildir davam edən məhkəmə çəkişmələri də onun probleminə kömək olmayıb.

Azsiyasət.com musavat.com-a istinadla xəbər verir ki, Natalya Ağayevanın himayəsində 3 azyaşlı uşağı var və onları təkbaşına böyüdür.

Natalya Ağayevanın 2020-ci il aprelin 22-də Xəzər rayonu, Şağan qəsəbəsi 6 ünvanında yerləşən fərdi yaşayış evində yanğın baş verib. Daşınmaz əmlak üzrə 35 min manat, evin içərisindəki məişət əşyaları üzrə isə 25 min manat zərər görüb. N.Ağayeva hadisədən əvvəl istehlakçı olaraq sığorta şirkətinin xidmətlərindən istifadə edərək evini sığorta etdiribmiş:

"Lakin sığorta şirkəti mənə dəymiş zərəri ödəməkdən imtina edir. İstehlakçı hüquqlarım pozulub. Sığorta şirkəti məni aldadıb və qanunsuz olaraq zərərimə olan bəzi sənədlərə imza atdırıb. Hadisədən sonra uşaqlarımla küçədə yaşamağa başlamışam”.

N.Ağayeva "Qala Sığorta" şirkəti tərəfindən aldadılması və yanan evinə görə ödəniş edilməməsi ilə bağlı Səbail Rayon Məhkəməsinə müraciət edib.

Onun sözlərinə görə hakim işə qərəzli yanaşır.

“İşə hərtərəfli və obyektiv baxılmır. Hakim mənə deyir ki, ağlın olardı aldanmazdın”,- deyə zərərçəkmiş vətəndaş deyir.