Türkiyə Ukrayna taxılına dəhliz aça biləcəkmi? - Məxfi danışıqlar gedir, ümidlər var, amma...

Ankara Bosfor boğazı vasitəsilə Ukrayna taxılının ixracına dəhliz açılması məqsədilə Moskva və Kiyevlə danışıqlar aparır. 

Bunu "Reuters" agentliyinə Türkiyənin vəzifəli rəsmilərindən biri deyib.

Xatırladaq ki, Ukraynanın Qara dəniz limanları Moskvanın fevral ayında başlanan müdaxiləsindən sonra Rusiya hərbi gəmiləri tərəfindən blokadaya alınıb və ixrac olunmalı 20 milyon tonadək Ukrayna taxılı anbarlarda qalır. Rusiya və Ukrayna qlobal taxıl ehtiyacının üçdə birini təmin edir. Bu səbəbdən də Ukrayna taxılının ixrac edilə bilməməsi dünyada ərzaq böhranı yarada bilər.

Türkiyə rəsmisi deyib ki, Ankara həm Kiyev, həm də Moskva ilə taxılın Ukraynadan daşınması üçün danışıqlar aparır. Rəsmi şəxs danışıqların məxfiliyi ilə bağlı adının açıqlanmasını istəməyib.

Rusiya xarici işlər nazirinin müavini Andrey Rudenko mayın 25-də demişdi ki, Moskva onun üzərinə qoyulmuş sanksiyaların qaldırılması müqabilində taxılın portlardan daşınmasına imkan verə bilər.

"Reuters" yazır ki, proseslə tanış başqa iki şəxs də Türkiyənin Ukrayna taxılının limanlardan çıxarılmasına kömək etdiyini təsdiqləyib. Məlumatı verən şəxs deyib ki, Türkiyə NATO üzvü olmasına baxmayaraq bu müharibədə Rusiya tərəfindən daha çox neytral ölkə kimi qəbul olunur: "Türkiyə bu taxılın Qara dənizdəki Odessa limanından çıxarılmasını bir növ monitorinq edə bilər”.

İstanbulda mənzillənmiş "Bosphorus Observer" konsaltinq firmasından Yoruk İşık deyib ki, Türkiyənin Qara dənizdə hazırda iki kreyseri, iki sualtı gəmisi və onlarca patrul və çevik hücum gəmiləri var və bunlar operativ qaydada taxılın daşınmasının monitorinqinə cəlb oluna bilərdi. 

Ekspert bunu da deyib ki, Türkiyə donanması nəzəri baxımdan ərzaq dəhlizinə həm nəzarət edə, həm də bu ərazini minalardan təmizləyə bilər.