Rusiya Çubaysın Avropadakı gizli hesabları ilə bağlı axtarışa başlayıb - "Milyardlar var"
Rusiya təhlükəsizlik rəsmiləri “Rosnano”nun keçmiş rəhbəri və Rusiya prezidentinin keçmiş köməkçisi Anatoli Çubaysın Avropadakı gizli hesabları ilə bağlı axtarışlara başlayıb.
Bu barədə TASS hüquq-mühafizə orqanlarındakı mənbələrə istinadən məlumat yayıb. “Güc strukturları Çubaysın Avropa banklarında mümkün gizli hesabları haqqında məlumatları yoxlayacaq”, – agentliyin həmsöhbəti bildirib.
Onun sözlərinə görə, bu hesablardakı xarici valyutanın həcmi bir neçə milyarda çata bilər.
Martın 23-də Çubays prezidentin xüsusi nümayəndəsi vəzifəsindən istefa verərək Rusiyanı tərk edib. Aprelin sonunda TASS Çubaysa yaxın mənbəyə istinadən xəbər verib ki, siyasətçi Avropadadır və Rusiyaya qayıtmağı planlaşdırmır.
Məlumata görə, “Rosnano”nun yeni rəhbəri Sergey Kulikov Rusiya Baş Prokurorluğundan şirkətin Çubaysın rəhbərlik etdiyi 2010-2020-ci illər üzrə işinin auditini aparmağı xahiş edib. Dövlət korporasiyasının yeni rəhbəri məktubunda şirkətə 28 milyard rubl ziyan vura biləcək bahalı maliyyələşdirmədən söz açıb. Kulikov “Rosnano”nun 2017-2018-ci illərdə Rusiya hökumətinə 1,1 milyard rubl ödəmədiyini də açıqlayıb.
