"Türksüz Ermənistan" şüarlı müxalifət beynəlxalq dəstək ala bilməz" - Erməni politoloq
"Parlament müxalifəti mahiyyət etibarı ilə kriminal oliqarxiyadır və apriori olaraq inqilab etmək iqtidarında deyil..."
Bir sıra erməni politoloqlar hesab edir ki, Ermənistanda müxalifətin inqilabi potensialı yoxdur və əvvəlki və indiki hakimiyyətlə əlaqələri səbəbindən geniş ictimai dəstək əldə etmələri mümkün olmayıb.
Bu haqda siyasi şərhçilər xarici mediaya açıqlamalarında danışıblar. Müşahidəçilər əmindir ki, Ermənistanda hakimiyyət məsələsi Qərblə Rusiya arasındakı qarşıdurmanın nəticəsindən asılıdır.
Xəbər verildiyi kimi, iyunun 7-də səhər saatlarında müxalifət İrəvanda Avropa İttifaqı səfirliyi qarşısında yürüş keçirib. Fəallar Aİ ölkələrinin hakimiyyət orqanlarını Ermənistan polisinin nümayişçilərə qarşı həddindən artıq güc tətbiq etməsinə reaksiya verməyə çağırıb.
İyunun 7-də İrəvandakı Aİ səfirliyinə yürüşdən sonra müxalifət tərəfdarları 37-ci gündür çadır şəhərciyinin qurulduğu Azadlıq meydanına qayıdıblar. Dünən axşam saatlarında isə etiraz aksiyası olmayıb...
Politoloq Suren Surenyants hesab edir ki, ritorikası “türksüz Ermənistan” şüarı üzərində qurulan müxalifət beynəlxalq dəstəyə arxalana bilməz. O bildirib ki, müxalifət öz siyasi şüarını nə qədər əsaslandırmağa çalışsa da, bu, irqçiliyin təzahürüdür, bunu nə Rusiya, nə də Qərb təqdir edə bilər.
“Qərb ölkələrini ikili standartlarda ittiham etməklə müxalifət primitiv davranır və bu yolla Rusiyadan kömək ala biləcəklərinə inanır”, - deyə Surenyants bildirib.
Politoloq hesab edir ki, müxalifət inqilabi potensiala malik deyil. O qeyd edib ki, seçki institutunun fəaliyyət göstərdiyi ölkələrdə küçə etirazları ilə hakimiyyət dəyişikliyinə ehtiyac yoxdur.
“Parlament müxalifəti mahiyyət etibarı ilə kriminal oliqarxiyadır və apriori olaraq inqilab etmək iqtidarında deyil. Onun [cinayətkar oliqarxiyanın] bacara biləcəyi maksimum şey çevriliş və ya saray intriqalarıdır. Cəmiyyət etiraz hərəkatının nə olduğunu, qərarların necə qəbul edildiyini bilmir. Yalnız vitse-spiker İşxan Saqatelyan görünür. Lakin o, sadəcə, etiraz hərəkatı adından bəyanatlar verən moderatordur. Xarizmatik lider olmadığı halda cəmiyyətin İşxan Saqatelyanın Robert Köçəryan və Serj Sarkisyanın moderatoru olmasından şübhələnməyə legitim haqqı var”, - deyə Surenyants izah edib.
Erməni şərhçinin fikrincə, Paşinyan hakimiyyətini tənqid edən müxalifətin qlobal problemi özünün siyasi alternativinin, yəni proqramının olmamasıdır...
