Lavrov Bakıda nəyi müzakirə edəcək - Zaxarova açıqladı
22 iyun, 2022 12:35
Rusiya xarici işlər naziri Sergey Lavrovun Azərbaycana işgüzar səfərinin gündəliyi açıqlanıb.
Bu barədə Rusiya XİN-in rəsmi nümayəndəsi Mariya Zaxarova bu gün keçirdiyi brifinqdə bildirib.
Zaxarovanın sözlərinə görə, Lavrovun Bakıda Azərbaycan Prezidenti ilə görüşü gözlənilir:
“Bundan başqa, azərbaycanlı həmkarı Ceyhun Bayramovla danışıqlar planlaşdırılır. Səfər zamanı Moskvada 22 fevral 2022-ci il tarixində imzalanan müttəfiqlik əməkdaşlığı haqqında bəyannamə müzakirə olunacaq. Rusiya, Azərbaycan və Ermənistan liderlərinin üçtərəfli razılaşmalarının həyata keçirilməsi üçün səylər diqqətə çatdırılacaq”.
Qeyd edək ki, Rusiya xarici işlər naziri Sergey Lavrov iyunun 23-24-də Azərbaycanda səfərdə olacaq.
