Türkiyə qorxusu qonşunu hərəkətə keçirdi - Fransa ilə yeni hərbi anlaşma
Avropa Birliyi üzvü Cənubi Kipr Fransanın “Airbus Helicopters” şirkəti ilə H145M tipli döyüş helikopteri almaq üçün müqavilə imzalayıb.
Sövdələşməyə 6 helikopterin alınması daxildir.
Cənubi Kiprin müdafiə naziri Xaralambos Petridis helikopterlərin alınması ilə bölgədəki dövlətlərlə tarazlıq yaradaraq müxtəlif beynəlxalq və regional tərəfdaşlıqların çərçivəsini gücləndirə biləcəklərini söyləyib.
Petridis qeyd edib ki, Türkiyənin adanın şimalındakı hərbi varlığı Cənubi Kipri narahat edir.
Müqavilənin maliyyə dəyəri barədə məlumat verilməyib. Yunan mətbuatı vertolyotların ümumi dəyərinin 140 milyon avro ola biləcəyini yazıb. Şimali Kipr Türk Cümhuriyyətinin rəhbərliyi isə Cənubun döyüş helikopterləri almaq cəhdini “regional sabitliyi təhlükə altına alan təxribat” kimi qiymətləndirib.
